მანქანების ყოველდღიური გადაადგილება დღეს არის სარეკორდო მაჩვენებელზე – ჩვენთვის ტრანსპორტის გაუმჯობესება არის საცობების პრობლემის გადაწყვეტის პირდაპირი გზა, – ამის შესახებ „ქრონიკის“ ეთერში თბილისის საკრებულოს თავმჯდომარემ, გიორგი ტყემალაძემ განაცხადა.
„ის, რომ საზოგადოებრივი ტრანსპორტი უნდა იყოს კონკურენტუნარიანი და მაქსიმალურად გაიზარდოს საზოგადოებრივი ტრანსპორტით მოსარგებლე ჩვენი მოქალაქეების რიცხვი, არის ძალიან მნიშვნელოვანი იმისთვის, რომ შევამციროთ მანქანების ყოველდღიური გადაადგილება, რაც არის დღეს სარეკორდო მაჩვენებელზე. ძალიან ბევრი ადამიანი მოძრაობს ჩვენს ქალაქში და რა თქმა უნდა ჩვენთვის ტრანსპორტის გაუმჯობესება არის საცობების პრობლემის პირდაპირი გადაწყვეტის გზა. რეფორმა არ შედგება მხოლოდ ერთი კომპონენტისგან – მხოლოდ ავტობუსის ჩანაცვლება, მეტროს მოდერნიზება და ა.შ. ეს არის კომპლექსური სისტემა და ჩვენ ვახდენთ ინფრასტრუქტურის იმგვარ გადაწყობას, რომ პრიორიტეტი იყოს ფეხით მოსიარულე, ეკომეგობრული და საზოგადოებრივი ტრანსპორტი, შემდეგ კი – ავტომობილი. როგორც კი, ინფრასტრუქტურა იქნება მზად იმისთვის, რომ ქალაქის მასშტაბით ყველა დერეფანი ამ პრინციპით იყოს შეკრული, დამერწმუნეთ, რომ ჩვენ ყველანი ვნახავთ საგრძნობ შედეგს“, – აღნიშნა ტყემალაძემ