გერმანიის ვიცეკანცლერმა რობერტ ჰაბეკმა ისრაელისადმი გერმანიის მხარდაჭერას გაუსვა ხაზი და გერმანიაში ანტისემიტური დანაშაულები და განწყობები დაგმო.
ჰაბეკმა თქვა, რომ ანტისემიტური სიძულვილის გამოვლენისთვის დამნაშავეები სათანადოდ დაისჯებიან. მანვე დაამატა, რომ დემონსტრაციების დროს ისრაელის დროშის დაწვა ან “ჰამასის ტერორის ქება” სისხლის სამართლის დანაშაულებია.
“ნებისმიერი გერმანელი მოქალაქე, ვინც ამას გააკეთებს, ამ დანაშაულისთვის სასამართლოში წარსდგება. ისინი, ვინც არ არიან გერმანიის მოქალაქეები, ასევე თავიანთი ბინადრობის ნებართვას გარისკავენ, ხოლო მათთვის, ვისაც არ აქვს ნებართვა, ეს დეპორტაციის მიზეზი გახდება”. – თქვა ჰაბეკმა.
ვიცეკანცლერმა გერმანიაში ისრაელზე ჰამასის თავდასხმის შემდეგ მზარდ ანტისემიტურ განწყობებზე ისაუბრა. მისი თქმით, ფრანკფურტში ებრაულ თემთან საუბრისას გაიგო, რომ ებრაელ ბავშვებს ბოლოდროინდელი ვითარების გამო სკოლებსა თუ სასპორტო კლუბებში წასვლისა და რელიგიური მრწამსის გამოხატვის ეშინიათ.
“ებრაული თემები აფრთხილებენ თავიანთ წევრებს, რომ საკუთარი უსაფრთხოებისთვის გარკვეულ ადგილებს მოერიდონ. ეს არის რეალობა დღეს აქ, გერმანიაში, თითქმის 80 წლის შემდეგ, რაც ჰოლოკოსტი მოხდა”. – თქვა ჰაბეკმა.
ჰაბეკის თქმით, ჰოლოკოსტზე გერმანიის პასუხისმგებლობის ფონზე, აუცილებელია, რომ ებრაელებმა იცხოვრონ “გერმანიაში თავისუფლად და უსაფრთხოდ, რომ აღარასდროს აღარ შეეშინდეთ თავიანთი რელიგიისა და კულტურის ღიად გამოხატვა”.