გაერთიანებულ სამეფოში პალესტინის ელჩმა, ჰუსამ ზომლოტმა გააკრიტიკა შეერთებული შტატები იმის გამო, რომ აშშ ვერ ასრულებს „პატიოსანი შუამავლის“ როლს ისრაელისა და „ჰამასის“ ომში, – მედიის ცნობით, ამის შესახებ ელჩმა CBS-ის ეთერში ისაუბრა.
„ჩვენ უნდა დავინახოთ, რომ აშშ ასრულებს პატიოსანი შუამავლის როლს და არ ავრცელებს ისრაელის ნარატივს. ჩვენ გვჭირდებოდა „ზრდასრული“ ოთახში და ეს არის აშშ. სამწუხაროდ, ჩვენ არ გვსმენია აშშ-სგან მსგავსი განცხადება“, – განაცხადა ზომლოტმა.
როგორც პალესტინის ელჩი აცხადებს, ისრაელის ომი არის არა „ჰამასის“, არამედ პალესტინელი ხალხის წინააღმდეგ.
ელჩმა ასევე აღნიშნა: „მთელი ეს საუბარი ჰუმანიტარულ პაუზებზე, უბრალოდ უპასუხისმგებლობაა. კაცობრიობის წინააღმდეგ ჩადენილი დანაშაულების პაუზები – ჩვენ ვაპირებთ ექვს საათს შეჩერებას ჩვენი შვილების მკვლელობაში, შემდეგ კი განვაახლებთ ბავშვების მკვლელობას?“.
მისი თქმით, დასავლეთ სანაპიროზე ვითარება ძალიან არასტაბილურია და შიშობს, რომ შესაძლოა, ეს უფრო ფართო, რეგიონულ ომში გადაიზარდოს.