პარლამენტის საგარეო ურთიერთობათა კომიტეტის სხდომაზე დეპუტატებმა წუთიერი დუმილით პატივი მიაგეს კირბალში მოკლული თამაზ გინტურის ხსოვნას.
„არ შემიძლია, არ გამოვეხმაურო კირბალში მომხდარ ტრაგედიას, როდესაც რუსეთის საოკუპაციო ძალების წარმომადგენლის მიერ გასროლილი ტყვიით გარდაიცვალა საქართველოს მოქალაქე. ეს არის კიდევ ერთი ტრაგიკული ფაქტი და რუსული ოკუპაციის ძალიან მძიმე შედეგი. ჩვენ ვგმობთ ამ არაჰუმანურ ფაქტს და ვუსამძიმრებთ გარდაცვლილის ოჯახის წევრებს და ახლობლებს“, – განაცხადა საგარეო ურთიერთობათა კომიტეტის თავმჯდომარემ, ნიკოლოზ სამხარაძემ.
კირბალის მიმდებარედ, ოკუპირებულ ტერიტორიაზე რუსეთის საოკუპაციო ძალებმა საქართველოს მოქალაქე თამაზ გინტური მოკლეს და უკანონოდ დააკავეს ერთი მოქალაქე. მომხდართან დაკავშირებით საქართველოს ცენტრალური ხელისუფლების მოთხოვნით, ერგნეთში შეხვედრა გაიმართა.