საპარლამენტო უმრავლესობის წევრმა, გიორგი ცაგარეიშვილმა ჟურნალისტებთან 2007 წლის ორი საარქივო დოკუმენტი წარმოადგინა, რომელთაგან ერთი, მისი თქმით, ყოფილი სამხრეთ ოსეთის ავტონომიურ ოლქში კონფლიქტის მშვიდობიანი მოგვარების სათანადო პირობების შექმნის შესახებაა, მეორე დადგენილება კი დროებითი ადმინისტრაციულ-ტერიტორიული ერთეულის შექმნას ეხება.
ცაგარეიშვილმა დაასახელა დღევანდელი ოპოზიციის ის წარმომადგენლები, რომლებმაც აღნიშნული დოკუმენტების მიღებას მხარი დაუჭირეს და აღნიშნა, რომ ეს ადამიანები დღეს ამტყუნებენ საქართველოს ხელისუფლებას, მაშინ, როდესაც თავის დროზე მოღალატეობრივი საქციელი თავად ჩაიდინეს.
„ლევან ბეჟაშვილს აქვს ხმა მიცემული, ძმებ ბერძენიშვილებს, გიგა ბოკერიას, ნინო ბურჯანაძეს, მიხეილ მაჭავარიანს, მაია ნადირაძეს და კიდევ ბევრს. იმ ადამიანებს, რომლებიც დღეს, ნებისმიერ შემთხვევაში ამტყუნებენ საქართველოს ხელისუფლებას. ამ უთავბოლო, მოღალატეობრივმა გადაწყვეტილებამ დაადგინა სწორედ ის საზღვარი, რომელიც მათ შორის ლომისას ტაძარზე გადის ახლა. დააკანონეს სამხრეთ ოსეთის, გამსახურდიას მიერ გაუქმებული ოლქის აღდგენა, გაატარეს ადმინისტრაციული საზღვრები ძველი ოლქის ადმინისტრაციულ საზღვრებზე და შემდეგ ჩვენ ე.წ. სარკოზის დოკუმენტით მივიღეთ ის, რაც მივიღეთ“, – აღნიშნა ცაგარეიშვილმა.
სახელმწიფო უსაფრთხოების სამსახურის ინფორმაციით, სოფელ კირბალის მიმდებარედ, ოკუპირებულ ტერიტორიაზე, ადგილობრივი მცხოვრების უკანონოდ დაკავების მცდელობისას რუსეთის საოკუპაციო ძალების მიერ სროლის შედეგად გარდაიცვალა საქართველოს მოქალაქე და უკანონოდ დააკავეს ერთი ადამიანი.