არავის ეპარება ეჭვი, რომ დღეს რომ ყოფილიყო „ნაციონალური მოძრაობა“ ხელისუფლებაში, აქ იქნებოდა ომი, უბედურება, ნგრევა და ეს ქვეყანა ვერ მიიღებდა ვერც სტატუსს და ვერც მშვიდობა იქნებოდა, ვერც ეკონომიკური განვითარება და ა.შ. აქვე მინდა ხაზგასმით ვთქვა – ჩვენი ხელისუფლება რომ ყოფილიყო 2008 წელს, ეს ომი არ მოხდებოდა- ამის შესახებ ირაკლი ღარიბაშვილმა ჟურნალისტებთან საუბრისას განაცხადა. პრემიერ-მინისტრის თქმით, „ქართული ოცნება“ არ დაკარგავდა კოდორის ხეობას და 100-ზე მეტ სოფელს და ქვეყნის ტერიტორიის 20% რუსეთის მიერ ოკუპირებული არ იქნებოდა.
„მე კიდევ ერთხელ მოვუწოდებ ამ დესტრუქციულ, რადიკალურ ოპოზიციას, რომ მათ არ აქვთ არანაირი უფლება ხმა ამოიღებენ და რაიმე კრიტიკული თქვან ხელისუფლების მიმართ. ხმის ამოღების უფლება არ აქვთ ამ ადამიანებს, იმიტომ რომ ყველაზე მძიმე დანაშაულები ჩაიდინეს – მიატოვეს კოდორის ხეობა, ჩახოცეს ჩვენი გმირი ჯარისკაცები, დატოვეს ბრძოლის ველზე, 100-ზე მეტი სოფელი ჩააბარეს ოკუპანტს და რუსული ჯარი, რომელიც გასული იყო ჩვენი ქვეყნის ტერიტორიიდან 2007 წელს, შემოაბრუნეს რამდენიმე თვეში. უგუნური, წინდაუხედავი თუ მიზანმიმართული პოლიტიკით. მჯერა, რომ ჩვენი თაობა ამ კითხვაზე პასუხს მიიღებს“, – განაცხადა პრემიერმა.