მადრიდში ყოფილ კატალონიელ პოლიტიკოსს სახეში ესროლეს. როგორც „პოლიტიკო“ იუწყება, კატალონიის სახალხო პარტიის ყოფილ თავმჯდომარეს, ალეხო ვიდალ-კვადრასს ესპანეთის დედაქალაქის ცენტრში, სალამანკას რაიონში ესროლეს და ყბის არეში დაიჭრა. ის საავადმყოფოშია გადაყვანილი და მის სიცოცხლეს საფრთხე არ ემუქრება.
ადგილი, სადაც ინციდენტი მოხდა, პოლიციას გადაკეტილი აქვს. ჯერ მომხდართან დაკავშირებით არავინ დაუკავებიათ. გავრცელებული ცნობით, პოლიტიკოსს მოტოციკლით მოძრავმა პირმა ესროლა.
ალეხო ვიდალ-კვადრასი კატალონიის სახლახო პარტიას 1991 წლიდან 1996 წლამდე ხელმძღვანელობდა. 2014 წლამდე ის ასევე ევროპარლამენტის დეპუტატი იყო.
ცნობისთვის, ესპანეთში ახლა ვითარება დაძაბულია. მიზეზი კი, სოციალისტურ პარტიასა და კატალონიის სეპარატისტულ პარტიებს შორის მიღწეული შეთანხმებაა, რაც ითვალისწინებს 2017 წელს კატალონიის დამოუკიდებლობის საკითხზე გამართული რეფერენდუმის ორგანიზატორების ამნისტიას. გავრცელებული ცნობით, ამნისტიის კანონი, რომელიც მომდევნო კვირას უნდა წარადგინონ პარლამენტში, 1 500 ადამიანის ამნისტიას ითვალისწინებს.