ირანმა „ჰამასის“ ხელმძღვანელობას შეატყობინა, რომ ისრაელთან ომი მათ გეგმებში არ შედის. ამის შესახებ Reuters-ი ირანულ და პალესტინურ წყაროებზე დაყრდნობით იტყობინება.
სააგენტოს ცნობით, თეირანის ასეთი პოზიცია გამოთქვა აიათოლა ალი ხამენეიმ „ჰამასის“ ლიდერ, ისმაილ ჰანიასთან შეხვედრაზე, რომელიც ნოემბრის დასაწყისში შედგა.
კერძოდ, Reuters-ის წყაროების ცნობით, ირანის ხელისუფლებამ „ჰამასს“ უთხრა, რომ მათ ისრაელზე თავდასხმის შესახებ წინასწარ არ შეატყობინეს. ამასთანავე, ალი ხამენეიმ დაარწმუნა ისმაილ ჰანია, რომ ირანი გააგრძელებს „ჰამასის“ მორალურ მხარდაჭერას, თუმცა ისრაელითან ღია დაპირისპირებაში არ შევა.
ასევე, როგორც Reuters-ის წყაროებისთვის გახდა ცნობილი, აიათოლა ხამენეიმ ისმაილ ჰანიასგან მოითხოვა „ჰამასის“ იმ წევრების „გაჩუმება“, რომლებიც ირანსა და „ჰეზბოლას“ ისრაელთან სრულმასშტაბიანი ომის დაწყებისკენ მოუწოდებენ.