თემურ ალასანია არ არის პოლიტიკოსი, არც კონკრეტული პარტიის წარმომადგენელი,- ამის შესახებ დეპუტატმა ხატია დეკანოიძემ განაცხადა, რითაც მიხეილ სააკაშვილის ბიძის ბოლოდროინდელ განცხადებებს გამოეხმაურა.
„თემურ ალასანია არის კერძო პირი. არ არის პოლიტიკოსი, არც კონკრეტული პარტიის წარმომადგენელი. არც ვიცი, რა განცხადებაზეა საუბარი, ამიტომ ვერანაირ კომენტარს ვერ გავაკეთებ“,- აღნიშნა დეკანოიძემ.
ამერიკაში ემიგრანტებთან შეხვედრაზე თემურ ალასანიამ რუსეთის მიერ ოკუპირებული ტერიტორიების ძალისმიერი გზით დაბრუნებაზე ისაუბრა და აღნიშნა, რომ ძალით წართმეული ტერიტორიების მშვიდობიანად დაბრუნება ისტორიას არ ახსოვს. მან ასევე თქვა, რომ გაყოფილი, გახლეჩილი, ერთმანეთს დატაკებული საქართველო ურჩევნია, რადგან ეს არის პლურალიზმი, დემოკრატია და სხვადასხვა აზრის წახალისება.