ვალერი ზალუჟნის განცხადებით, უკრაინის სამხედრო ძალები ქალაქ მარინკის ჩრდილოეთ ნაწილში იმყოფებიან და ქალაქის საზღვრებს გარეთ თავდაცვის ხაზი მოამზადეს. ამის შესახებ უკრაინის შეიარაღებული ძალების მთავარსარდალმა პრესკონფერენციაზე განაცხადა, როდესაც უპასუხა კითხვას იმის შესახებ აიღო თუ არა რუსეთმა დონეცკის ოლქის ეს ქალაქი.
„ჩვენი მიწის თითოეულ ნაწილს ვიცავთ, მაგრამ როდესაც ამ ვიწრო ნაწილში მტრის ჭურვები იწყებენ ამ ადგილის გადათხრას, ჩვენი მებრძოლების სიცოცხლე ჩვენთვის უფრო მნიშვნელოვანია. დღეის მდგომარეობით, ჩვენი ჯარები კვლავ იმყოფებიან ქალაქის ჩრდილოეთ ნაწილში. ჩვენმა ჯარებმა მოამზადეს თავდაცვითი ხაზი ამ დასახლებულ პუნქტს გარეთ, მაგრამ შემიძლია, ვთქვა, რომ ეს დასახლებული პუნქტი აღარ არსებობს“, – განაცხადა ზალუჟნიმ.
მისივე თქმით, მარინკა თითქმის 2 წელი უძლებდა რუსეთის შეტევებს, რომელიც იგივე ტაქტიკას იყენებდა, როგორიც მანამდე ბახმუტში.
„ანადგურებდნენ ქუჩებს, იხოცებიან ჩვენი ჯარისკაცები. იმაში, რომ ახლა მარინკას გარეუბანში გავედით და ზოგან უკვე დავტოვეთ პოზიციები, არაფერია ისეთი, რამაც შეიძლება საზოგადოებაში რეზონანსი გამოიწვიოს. ეს ომია და სამწუხაროდ, ასეა“, – განაცხადა ზალუჟნიმ.