რუსეთმა აშშ-ს მიანიშნა, რომ მზად არის ომის დასრულების საკითხზე მოლაპარაკებებისთვის, მათ შორის მომავალში უკრაინისთვის უსაფრთხოების გარანტიების მინიჭებაზე სასაუბროდ, თუმცა ვაშინგტონი მოსკოვის ამ ნაბიჯს სკეპტიკურად უყურებს. ამის შესახებ კრემლთან დაახლოებულ ორ წყაროზე დაყრდნობით სააგენტო Bloomberg-ი წერს.
წყაროების თქმით, რუსეთის ხელისუფლებამ ეს გზავნილები ამერიკელ მაღალჩინოსნებს 2023 წლის დეკებმერში, შუამავლის მეშვეობით გაუგზავნა.
Bloomberg-ის წყაროები ამბობენ, რომ პუტინმა შეიძლება აღარ მოითხოვოს უკრაინისგან ნეიტრალიტეტის გამოცხადება და ნატოში შესვლაზე უარის თქმა. ამის სანაცვლოდ მოსკოვი მოითხოვს, რომ კიევმა აღიაროს რუსეთის კონტროლი იმ ტერიტორიებზე, რომელთა ოკუპაციაც ბოლო წლებში რუსულმა ჯარმა მოახდინა.
აშშ-ის ეროვნული უსაფრთხოების საბჭოს პრესსპიკერის, ედრიენ უოტსონის თქმით, მათთვის არაფერია ცნობილი რუსეთის პოზიციის ცვლილების შესახებ, რაზეც Bloomberg-ის წყაროები საუბრობენ.
„უკრაინა თვითონ გადაწყვეტს, გამართოს თუ არა მოლაპარაკებები რუსეთთან, როდის და როგორ მოხდება ეს“, – აღნიშნა უოტსონმა.
კრემლის პრესსპკერი დიმიტრი პესკოვი აცხადებს, რომ პუტინმა არაერთხელ გამოთქვა მზადყოფნა მოლაპარაკებებისთვის.
„განზრახული გვაქვს, მივაღწიოთ ჩვენს მიზნებს. უმჯობესი იქნებოდა, ეს რომ დიპლომატიური გზით მომხდარიყო, თუმცა თუ ეს არ მოხდება, სამხედრო ოპერაცია გაგრძელდება იქამდე, ვიდრე ჩვენს მიზნებს არ მივაღწევთ“, – აღნიშნა პესკოვმა.