ლევან დავითაშვილის თქმით, საქართველოს მოქალაქეებისთვის უვიზო მიმოსვლის რეჟიმის დაწესება საქართველო-ჩინეთს შორის კავშირებს შეუწყობს ხელს, მათ შორის ეკონომიკური თვალსაზრისით. ამ თემაზე ეკონომიკისა და მდგრადი განვითარების მინისტრმა, ვიცე-პრემიერმა ლევან დავითაშვილმა მთავრობის სხდომის შემდეგ გამართულ ბრიფინგზე ისაუბრა.
მან ჩინეთის გადაწყვეტილებას მნიშვნელოვანი უწოდა და აღნიშნა, რომ ახლა ტექნიკური სამუშაოები მიმდინარეობს ამ გადაწყვეტილების ძალაში შესასვლელად.
„ეს გადაწყვეტილება მალე შევა ძალაში, ახლა მიმდინარეობს ტექნიკური სამუშაოები. შესაბამისად, ჩვენს მოქალაქეებს მიეცემათ საშუალება ყველანაირი ბარიერის გარეშე იმოგზაურონ ჩინეთში. ბუნებრივია ეს ჩვენ ქვეყნებს შორის კავშირებს ნამდვილად შეუწყობს ხელს. პირველ რიგში, ეს ძალიან მნიშვნელოვანი იქნება სავაჭრო ეკონომიკური კუთხით, რადგან ჩინეთი საქართველოს მნიშვნელოვანი სავაჭრო ეკონომიკური პარტნიორია. ბევრი ჩვენი ქვეყნის მოქალაქე ეკონომიკური ურთიერთობებისთვის ჩინეთში მიემგზავრებოდა, მაგრამ ეს არ იყო მარტივი.
ვფიქრობ, უვიზო რეჟიმი ამ პროცესს უფრო ხელს შეუწყობს, გაამარტივებს და საქართველოდანაც მეტი ვიზიტორი იქნება ჩინეთში. ჩინეთის სხვადასხვა ავიაკომპანიასთან მუდმივად ვსაუბრობდით იმაზე, რომ მეტი პირდაპირი ფრენა იყოს ჩინეთის სხვადასხვა ქალაქს შორის. მხოლოდ ამ გზით შეგვიძლია ტურიზმის სექტორში მნიშვნელოვანი რაოდენობის გენერირება. აქედან გამომდინარე, ამ კუთხითაც გადაწყვეტილება წამახალისებელი იქნება. ვფიქრობ, ჩინეთთან არსებული დინამიკა მიმდინარე წელს კიდევ უფრო გააქტიურდება. შემდგომ წლებში პრაქტიკულ ეკონომიკურ შედეგებსაც მოგვიტანს. კულტურული და სხვა ხალხთაშორის ურთიერთობის თვალსაზრისითაც უვიზო მიმოსვლა ორივე ქვეყნის მოქალაქეებისთვის მნიშვნელოვანია. დღეების საკითხია, როდესაც ძალაში შევა“, – განაცხადა დავითაშვილმა.
ჩინეთმა საქართველოს მოქალაქეებისთვის უვიზო მიმოსვლა დააწესა.