უკრაინის ხელისუფლება უახლოეს დროში „ომის სპონსორების“ სიაზე უარს იტყვის – ამის შესახებ სააგენტო Reuters-ი იტყობინება. როგორც სააგენტოს ორმა წყარომ განუცხადა, 22 მარტს უკრაინა საჯარო სივრციდან მოხსნის „ომის სპონსორების“ სიას, მათ შორის დაიხურება ვებგვერდი, რომელზეც „ომის სპონსორი“ კომპანიების ჩამონათვალი ქვეყნდება.
მათი ინფორმაციით, ეს გადაწყვეტილება უკრაინის ხელისუფლებამ მიიღო რამდენიმე ქვეყნის, მათ შორის ავსტრიის, უნგრეთის, ჩინეთისა და საფრანგეთის მხრიდან ზეწოლის შედეგად, რომლებიც უკმაყოფილოები იყვნენ იმით, რომ „შავ სიაში“ მათი კომპანიები მოხვდნენ.
აღსანიშნავია, რომ „ომის სპონსორი“ კომპანიების ჩამონათვალს იურიდიული ძალა არ ჰქონდა, მაგრამ კომპანიების რეპუტაციაზე გავლენის მოხდენა შეეძლო. ამ ჩამონათვალში უკრაინის ხელისუფლებას შეჰყავს კომპანიები, რომლებიც რუსეთის სამხედრო-სამრეწველო კომპლექსთან თანამშრომლობენ, ან რუსეთში საქმიანობას და ბიუჯეტში გადასახადების შეტანას აგრძელებენ. მაგალითად, სხვადასხვა დროს სიაში მოხვდნენ ფრანგული კომპანიები Auchan-ი და Leroy Merlin-ი, რამაც საფრანგეთის უკმაყოფილება გამოიწვია, ავსტრია კი ჩამონათვალიდან Raiffeisen Bank-ის ამოღებას ითხოვდა.