აშშ-ის სახელმწიფო მდივანთან, ენტონი ბლინკენთან შეხვედრის შემდეგ, ისრაელის პრემიერ-მინისტრმა, ბენიამინ ნეთანიაჰუმ განაცხადა, რომ ისრაელი ქალაქ რაფაჰში უნდა შევიდეს და საჭიროების შემთხვევაში, ამას აშშ-ის მხარდაჭერის გარეშეც გააკეთებს.
“მე ვუთხარი მას [ენტონი ბლინკენს], რომ ღრმად ვაფასებ იმ ფაქტს, რომ ხუთ თვეზე მეტია, ჩვენ ერთად ვდგავართ “ჰამასის” წინააღმდეგ ომში. მე ვუთხარი, რომ ჩვენ ვაცნობიერებთ ომის ზონაში მშვიდობიანი მოსახლეობის ევაკუაციის აუცილებლობას და რა თქმა უნდა, ჰუმანიტარულ საჭიროებებზე ზრუნვას და ამაზე ვმუშაობთ”, – აღნიშნა ისრაელის მთავრობის მეთაურმა.
“მაგრამ მე ასევე ვუთხარი, რომ ჩვენ არ გვაქვს გზა, რომ დავამარცხოთ “ჰამასი” რაფაჰში შესვლისა და იქ დარჩენილი [“ჰამასის”] ბატალიონების განადგურების გარეშე. მე ვუთხარი, რომ იმედი მაქვს, რომ ამას გავაკეთებთ ამერიკის მხარდაჭერით, მაგრამ თუ დაგვჭირდება, ამას მარტოც გავაკეთებთ”, – დასძინა ბენიამინ ნეთანიაჰუმ.