უკრაინის შეიარაღებულ ძალებს ძალიან სჭირდებათ ახალი ძალები რუსეთის მასიური შეტევების შესაჩერებლად, – წერს ამერიკული გაზეთი The Wall Street Journal-ი.
კანონპროექტი, რომელიც მიზნად ისახავს უკრაინაში მობილიზაციის გაფართოებას, უკრაინის პარლამენტში რამდენიმეთვიანი დებატების შემდეგ შეჩერებულია.
“ჩვენ ვიბრძვით, რათა გაწვევის ასაკი 25 წლამდე დავწიოთ. ეს არაპოპულარული გადაწყვეტილებაა. ჩვენ უნდა გავზარდოთ იმ ადამიანების რაოდენობა, რომელთა მობილიზაციაც შესაძლებელია”, – აღნიშნა უკრაინის მმართველი პარტიის დეპუტატმა, ფედორ ვენისლავსკიმ.
გაზეთი The Wall Street Journal-ი აღნიშნავს, რომ საბრძოლო მასალის ნაკლებობასთან ერთად ჯარისკაცების ნაკლებობა უკრაინის ყველაზე დიდი გამოწვევაა.
“უკრაინელების აბსოლუტური უმრავლესობა მხარს უჭერს მთავრობას რუსეთის წინააღმდეგ ბრძოლის გაგრძელებაში, მაგრამ გასულ წელს უკრაინის კონტრშეტევის წარუმატებლობამ და ამ პროცესში ათიათასობით ჯარისკაცის დაკარგვამ შეარყია უკრაინელების რწმენა, რომ მათ შეუძლიათ ტერიტორიის დაბრუნება”, – ნათქვამია სტატიაში.
პროფესიონალი უკრაინელი ჯარისკაცები ამბობენ, რომ მათ განსაკუთრებით ესაჭიროებათ ახალგაზრდები, რადგან გაწვეულთა დიდი ნაწილი საშუალო ასაკისაა.