სხვა შეფასება და ეს არის ძალიან მძიმე შეფასება, მე არ შემიძლია მივცე პრეზიდენტის ამ განცხადებას, – ასე შეაფასა პარლამენტის თავმჯდომარემ, ირაკლი კობახიძემ საქართველოს პრეზიდენტის გუშინდელ განცხადება, სადაც გიორგი მარგველაშვილის განმარტებით, საკონსტიტუციო კომისიის მიერ არა კონსტიტუციის შინაარსობრივ გადახედვასთან გვაქვს საქმე, არამედ საუბარია კონკრეტულ პოლიტიკოსთან დაკავშირებული გადაწყვეტილების მიღებაზე. კობახიძის განმარტებით, კომისიის წევრები პრაქტიკულად, პრეზიდენტის სტატუსს არ ეხებიან, ამასთან დაკავშირებითაც პრაქტიკულად შეთანხმება მიღწეულია სახელმწიფო საკონსტიტუციო კომისიაში.
„პირველ რიგში, ეს არის სახელმწიფო საკონსტიტუციო კომისიის დისკრედიტაციის და საზოგადოების შეცდომაში შეყვანის სრულიად შეგნებული მცდელობა. ეს არის ძალიან მძიმე შეფასება, მე არ შემიძლია მივცე პრეზიდენტის ამ განცხადებას სხვა შეფასება. ჩვენ ყველამ ვიცით რა ტიპის განხილვა გვაქვს სახელმწიფო საკონსტიტუციო კომისიაში და ერთ-ერთი მთავარი საფუძველი იმისა, რომ ჩვენი მხრიდან გაჟღერდა პოზიცია პრეზიდენტის არჩევის წესთან დაკავშირებით, სწორედ იმას ეფუძნებოდა, რომ სუბიექტურ მოსაზრებებზე არ ყოფილიყო დაფუძნებული არც ერთი გადაწყვეტილება, რომელიც მიიღება სახელმწიფო საკონსტიტუციო კომისიაში. სწორედ ამ მოსაზრებიდან გამომდინარე, ჩვენ განვაცხადეთ, რომ ჩვენი პოზიციის თანახმად, შემდეგი საპრეზიდენტო არჩევნები ვფიქრობდით, რომ უნდა ჩატარებულიყო პირდაპირი წესით და მხოლოდ ამის შემდეგ უნდა გადავსულიყავით არაპირდაპირ არჩევნებზე. გარდა ამისა, რაც შეეხება სტატუსს, პრაქტიკულად, პრეზიდენტის სტატუსს ჩვენ არ ვეხებით. ამასთან დაკავშირებითაც, პრაქტიკულად, შეთანხმება მიღწეულია სახელმწიფო საკონსტიტუციო კომისიაში. რაც შეეხება პრეზიდენტის უფლებამოსილებებს, აქაც პრაქტიკულად მინიმალურია ის ცვლილებები, რომლებიც შეიძლება განხორციელდეს. იმდენად არის შეზღუდული დღეს პრეზიდენტის უფლებამოსილებები 2010 წლის ცვლილებების საფუძველზე, რომ სულ რომ ეს მიზანი გვქონდეს და გვამოძრავებდეს, დამატებით ვერანაირ არსებით ცვლილებას ვერ განახორციელებ, პრეზიდენტის უფლებამოსლებების შეკვეცის თვალსაზრისით. აქედან გამომდინარე, ის განცხადება, რომ თითქოს კომისიის ერთადერთი მიზანი არის ერთი კონკრეტული პოლიტიკოსის უფლებამოსილებების შეზღუდვა თუ რაიმე ამდაგვარი, ეს არის საზოგადოების შეცდომაში შეყვანის სრულიად აშკარა, შეგნებული მცდელობა. ამ შემთხვევაში, ჩვენ საქმე გვაქვს კომისიის დისკრედიტაციის შეგნებულ მცდელობასთან.
არ შეიძლება საზოგადოება შევიყვანოთ შეცდომაში, არ შეიძლება საზოგადოება ასეთი ფორმით მოვატყუოთ. სხვანაირი შეფასება ამ ყველაფერს არ შეიძლება მიეცეს“, – განაცხადა კობახიძემ.
როგორც საქართველოს პრეზიდენტმა გუშინ ბრიფინგზე განაცხადა, იგი საქართველოს მოქალაქეებს აქტიურ და ფართო ფორმატებს შეუქმნის, სადაც ისინი საკუთარ პოლიტიკურ შეხედულებებს, ამა თუ იმ საკითხზე საკუთარ პოზიციას დააფიქსირებენ. გიორგი მარგველაშვილის განცხადებით, საქართველოს მოქალაქეებს არ უნდა წაერთვათ უფლება, თავად აირჩიონ ქვეყნის პრეზიდენტი.