საქართველოს პრეზიდენტი დარწმუნებულია, რომ საპატრარქოს ირგვლი განვითარებული მოვლენები მშვიდად წარიმართება და სიმართლე აუცილებლად გაირკვევა. საზოგადოებას კი ამ მიმართულებით სიმშვიდისკენ მოუწოდებს.
პრეზიდენტმა გიორგი მარგველაშვილმა აღნიშნულ საკითხებზე ტელეკომპანია „იმედის“ გადაცემა „იმედის დროში“ დღეს ისაუბრა.
„პატრიარქს აქვს ძალიან დიდი როლი. ის მართავს ქართულ ეკლესიას. შესაბამისად, პატრიარქის პოზიცია, რომ კომპეტენტურ ორგანოებს მიეცეს მუშაობის საშუალება და ეკლესიას თვითონ მიხედავს, არის მთავარი. მე მგონი, ჩვენ ცოტა გვერდზე უნდა გავდგეთ“, – განაცხადა მარგველაშვილმა.
პრეზიდენტის თქმით, „ძალიან ბევრი ეგზალტირებული ადამიანის გამოსვლებს ვისმენთ ეკლესიის ირგვლივ განვითარებულ მოვლენებზე. საზოგადოებას მოვუწოდებ, მშვიდად მიადევნოს ამ ყველაფერს თვალი. ყველაფერი გაირკვევა. საკმაოდ კარგი ადვოკატები ჰყავს დეკანოზ გიორგის და საკმაოდ კარგად მუშაობს პროკურატურაც“.