პოლონეთის პრეზიდენტი ანჯეი დუდა აშშ-ის რესპუბლიკური პარტიის საპრეზიდენტო კანდიდატს, დონალდ ტრამპს შეხვდა. შეხვედრა ნიუ იორკში, „ტრამპ თაუერში“ გაიმართა.
შეხვედრის დაწყებამდე ტრამპმა ჟურნალისტებს განუცხადა, რომ ის დიდ პატივს სცემს დუდას და მასთან ძალიან კარგი და ახლო ურთიერთობა ჰქონდა, ხოლო პრობლემები არასდროს ჰქონიათ.
მანამდე მედიასთან კომენტარი გააკეთაა დუდამაც. როგორც პოლონეთის პრეზიდენტმა მედიას განუცხადა, ის შეხვედრაზე პირადად ტრამპმა მიიწვია.
„პრეზიდენტები საგარეო ვიზიტის ფარგლებში სხვადასხვა პოლიტიკოსსაც ხვდებიან. ეს ნორმალურია, როდესაც ორ ქვეყანას ერთმანეთთან კარგი ურთიერთობა აქვს. მათ ასევე სურთ, რომ კარგი ურთიერთობა ჰქონდეთ პოლიტიკური სცენის სხვადასხვა მხარესთან. მინდა, განვაცხადო, რომ თავად დონალდ ტრამპმა მომიწვია მის სახლში. ასე რომ, ეს არის პირადი ვიზიტი, პირადი მოწვევა. ჩვენ ერთმანეთთან ოთხი წლის განმავლობაში ვთანამშრომლობდით, კარგი ურთიერთობა გვაქვს ერთმანეთთან“, – ამბობს დუდა.