იერუსალიმში, გოლგოთას გზას მორწმუნეები და სასულიერო პირები ლოცვით და გალობით გადიან. „ქრონიკაში“ პირდაპირი ჩართვის დროს მამა დავით რუხაძემ დღევანდელი დღის მნიშვნელობაზე ისაუბრა.
„მაცხოვარი ჩვენი იესო ქრისტე, რომელიც მოვიდა კაცობრიობის გამოხსნისათვის, სწორედ დღევანდელ დღეს, ჩვენ, ადამიანებმა ჯვარზე გავაკარით. მაცხოვარმა გაიარა ეს [გოლგოთის] გზა, გაიარა გზა ტანჯვის, გვემის, უდიერი დამოკიდებულების. მას მოუწვეს უსამართლო სასამართლო. ეს ყველაფერი დაგვირგვინდა ჯვარცმით. ამით მაცხოვარმა აღასრულა წინასაუკუნო განგებულება, რაც თავის დროზე ადამს აღუთქვა ღმერთმა. ასე რომ, დღევანდელი დღე არის როგორც მძიმე დღე ჩვენთვის, ასევე გამარჯვებით დამაგვირგვინებელი. ეს დღე უნდა იყოს თითოეული ქართველისათვის და მართლმადიდებელი ქრისტიანისთვის ახალი ცხოვრების დასაწყისი. ჩვენ უნდა გავიაზროთ დღევანდელი დღის მნიშვნელობა, გავიაზროთ რა გააკეთა ჩვენთვის ღმერთმა, რა სიყვარულით გავიდა ამ მსხვერპლზე, რა მოითმინა ჩვენთვის და ამით გაძლიერებულები უნდა განვეწყოთ ისე, რომ დავიწყოთ ახალი ცხოვრება. სრულიად საქართველოს მინდა ვუსურვო, რომ იყოს საქართველოში სიყვარული, სიხარული, ქართველს უყვარდეს ქართველი, აღარ იყოს შუღლი, გაუტანლობა და ერთი პირით, ერთი გულით გვედიდებინოს და გვყვარებოდეს სამშობლო. დღევანდელი ჩვენი მომლოცველობითი მოგზაურობა სწორედ დასტურია იმის, რომ ქართველებს ყოველთვის გვქონდა აქ ძალიან დიდი გავლენა, დაფასება. მომლოცველობითი მოგზაურობა ემსახურება ასევე იმას, რომ წავიღოთ საქართველოში მადლი და წყალობა რაც უნდა გადავცეთ იმ ადამიანებს, რომლებიც ამას ელოდებიან“, – აღნიშნა სასულიერო პირმა.