რუსეთის თავდაცვის სამინისტრო დონეცკის ოლქში მდებარე დასახლება ოჩერეტინოს დაკავების შესახებ იუწყება.
აღნიშნული დასახლება ქალაქ ავდეევკის ჩრდილო-დასავლეთით მდებარეობს. როგორც რუსეთის თავდაცვის უწყებაში აცხადებენ, დასახლება ოჩერეტინო სამხედრო შენაერთ „ცენტრის“ ქვედანაყოფმა დაიკავა.
ამასთან, რუსეთის თავდაცვის სამინისტროში აცხადებენ, რომ „რუსეთის ოპერატიულ-ტაქტიკურმა ავიაციამ, სარაკეტო ძალებმა და არტილერიამ ოდესაში დასავლური წარმოების სარაკეტო შეიარაღების საწყობი, ხოლო ხარკოვის ოლქში რადიოლოკაციური სადგური გაანადგურა“.
როგორც „ბიბისის“ რუსულენოვანი სამსახური წერს, რუსეთის არმიის შეტევა ოჩერეტინოს რაიონში ჯერ არ გარდაქმნილა მნიშვნელოვან წინსვლად, თუმცა ეს აჩვენებს, ერთი მხრივ, უკრაინის არმიის გადაღლას და, მეორე მხრივ, რუსეთის არმიის გაზრდილ შესაძლებლობას, რეაგირება მოახდინოს კრიზისებზე და ისარგებლოს ამით.
მედიის ცნობით, რუსეთი ოჩერეტინოს შემდეგ აგრძელებს შეტევას დასავლეთით, ქალაქ პოკროვსკის მიმართულებით, თუმცა მათ ასევე აქვთ შესაძლებლობა, შეტევა ჩრდილოეთით განავითარონ, ჩასოვი იარის მიმართულებით, რათა ალყაში მოაქციონ ახლომდებარე მონაკვეთზე დისლოცირებული უკრაინული ძალები.