თბილისის ერთ-ერთ ქუჩას შესაძლოა, საქართველოს საპატიო მოქალაქის, ამერიკელი ბიზნესმენისა და საზოგადო მოღვაწის, ბობ უოლშის სახელი ეწოდოს – ამგვარი ინიციატივით საქართველოს პრემიერ-მინისტრმა თბილისის მერიასა და საკრებულოს მიმართა.
გიორგი კვირიკაშვილი ბობ უოლშის ხსოვნის საღამოს დაესწრო და მის მეგობრებთან ერთად, საქართველოს ნამდვილი ქომაგი გაიხსენა.
პრემიერ-მინისტრის თქმით, ბობ უოლში ამერიკის შეერთებულ შტატებში საქართველოს უდიდესი მხარდამჭერი იყო, რომელიც 80-იან წლებში საქართველოთი ერთ-ერთი პირველი დაინტერესდა.
„ეს იყო პირველი ყინულის გატეხვა, რომელსაც შემდგომი განვითარებისთვის გზამკვლევის ფუნქცია ჰქონდა. ამიტომ არის განსაკუთრებულად დასაფასებელი ბობ უოლშის მეგობრობა საქართველოსთვის და ამიტომ არის განსაკუთრებული ის საქმე, რომელიც მან საქართველოსთვის გააკეთა. მან გამოიყენა მთელი თავისი რესურსი, ის იყო პიონერი, რომელიც ჩამოვიდა აქ საქართველოსთვის ურთულეს პერიოდში. ბობმა გზამკვლევის როლი ითამაშა ძალიან ბევრი ადამიანისთვის, რომელთაც სურდათ საქართველოსთან ურთიერთობა. ჩვენთვის დიდი პატივია, რომ ის არის საქართველოს საპატიო მოქალაქე”, -განაცხადა პრემიერმა სიტყვით გამოსვლისას.
ამერიკელი ბიზნესმენისა და საზოგადო მოღვაწის, ბობ უოლშის ხსოვნისადმი მიძღვნილი ღონისძიება ბობ უოლშის ქართველი მეგობრების, მათ შორის, საგარეო ურთიერთობების საკითხებში პრემიერ-მინისტრის მრჩეველის, თედო ჯაფარიძის ინიციატივით გაიმართა, რომელიც ხსოვნის საღამოს უძღვებოდა.