მეგობარი ქვეყანა როცა ხარ, ხომ უნდა გვითხრა კონკრეტული არგუმენტი და აგვიხსნა, რატომ არის გამჭვირვალობა ცუდი, – ამის შესახებ თბილისი მერმა, კახა კალაძემ განაცხადა.
კალაძე კიდევ ერთხელ გამოეხმაურა საქართველოს ხელისუფლების მიმართ დასავლეთის მხრიდან კრიტიკას, რომელიც „უცხოური გავლენის გამჭვირვალობის შესახებ“ კანონპროექტს ეხება.
„კრიტიკა, რომელიც მოდის და რომელსაც არანაირი არგუმენტი არ ახლავს, გაუგებარია. ჩვენ არაერთი განცხადება გავაკეთეთ, რომ მზად ვართ, შევიდეთ შინაარსობრივ განხილვაში, თუნდაც საჯარო პოლემიკა გავმართოთ, რათა საზოგადოებისთვის ყველა დეტალი ხელმისაწვდომი იყოს. ასევე, პრემიერ-მინისტრმა რამდენჯერმე მოუწოდა ელჩებს, თუ სურვილი ექნებოდათ, მათი ჩართულობაც ყოფილიყო. თუმცა, ვერ მივიღეთ პასუხი, არგუმენტი, რატომ შეიძლება, გამჭვირვალობა იყოს ცუდი. გაუგებარია ზეწოლა, რომელიც აღნიშნულ კანონთან დაკავშირებით ხორციელდება. ჩვენ გავაკეთეთ განცხადებები, რომ ამ კანონის მიღება მნიშვნელოვანია ჩვენი ქვეყნისთვის, სახელმწიფოებრიობისა და სუვერენიტეტის გაძლიერებისთვის, რათა საზოგადოებას ჰქონდეს სრული ინფორმაცია, რაში იხარჯება დონორი ორგანიზაციებისგან შემოსული თანხები“, – აღნიშნა კახა კალაძემ.
მისივე თქმით, აღნიშნულ კანონპროექტთან დაკავშირებით, არგუმენტები ქვეყნის არც გარედან და არც შიგნიდან არ არსებობს.
„როგორც ქვეყნის შიგნით, ასევე ქვეყნის გარედან ვერ მოვისმინეთ არგუმენტები. შეიძლება ჩვენ ვცდებით რაღაცაში, არასწორ კანონს ვიღებთ, მაგრამ როცა მეგობარი ქვეყანა ხარ, ხომ უნდა გვითხრა კონკრეტული არგუმენტი და აგვიხსნა, რატომ არის გამჭვირვალობა ცუდი? ან რომელი მუხლი მოდის წინააღმდეგობაში ადამიანის უფლებებთან? ან რომელი მუხლი ეწინააღმდეგება არასამთავრობო ორგანიზაციების საქმიანობას? არგუმენტები უბრალოდ არ არსებობს? მარტივი სიცრუის კამპანიაა ჩართული, რომ ეს ქართული კანონი, თითქოს არის რუსული. არადა ამაზე პასუხს ვერავინ სცემს, რატომ არის რუსული. მათი ერთ-ერთი მთავარი არგუმენტი, რაც გუშინაც მოვისმინეთ, არის „იმიტომ“. წარმოუდგენელია, როგორ რეალობაში გვიწევს მუშაობა. ვფიქრობ, საზოგადოება ყველაფერს ნათლად ხედავს, რა პროცესები მიდის, რატომ არის ამხელა აჟიოტაჟი ატეხილი“, – განაცხადა დედაქალაქის მერმა.