დავით აღმაშენებლის სახელობის საქართველოს ეროვნულ თავდაცვის აკადემიას გაცნობითი ხასიათის ვიზიტით გორის, ხაშურის, ქარელის, კასპის, ბორჯომისა და მცხეთის მუნიციპალიტეტების საგანმანათლებლო რესურსცენტრების ხელმძღვანელები და ამავე მუნიციპალიტეტების სამოცდაცხრა საჯარო სკოლის დირექტორი ეწვივნენ.
სტუმრებს აკადემიის მეთაური, ბრიგადის გენერალი მამია ბალახაძე და მეთაურის პირველი მოადგილე, პოლკოვნიკი იმედა გვრიტიშვილი შეხვდნენ.
აკადემიის მეთაურმა სტუმრებს ვიზიტისთვის მადლობა გადაუხადა და ყურადღება გაამახვილა სკოლებთან თანამშრომლობის მნიშვნელობაზე. მეთაურმა აღნიშნა, რომ ახალგაზრდებში პატრიოტული სულისკვეთების, პასუხისმგებლობისა და ქვეყნის სამსახურისთვის აუცილებელი ღირებულებების ჩამოყალიბებაში საგანმანათლებლო დაწესებულებებს განსაკუთრებული როლი აკისრიათ. მან ასევე ისაუბრა აკადემიის მზადყოფნაზე, ხელი შეუწყოს სკოლის მოსწავლეების ინფორმირებულობას სამხედრო განათლებისა და აკადემიაში არსებული შესაძლებლობების შესახებ.
ვიზიტის ფარგლებში სტუმრები გაეცნენ აკადემიის საქმიანობის ძირითად მიმართულებებს, სასწავლო პროცესს, საბაკალავრო და სამაგისტრო საგანმანათლებლო პროგრამებს, იუნკერთა მომზადების სპეციფიკასა და აკადემიაში არსებულ სასწავლო-მატერიალურ ბაზას.
შეხვედრის მიზანს ეროვნული თავდაცვის აკადემიის შესახებ ცნობადობის ამაღლება, სკოლებთან ურთიერთობის გაღრმავება და ახალგაზრდებში სამხედრო განათლებისა და თავდაცვის სფეროს მიმართ ინტერესის ხელშეწყობა წარმოადგენდა.
ვიზიტის ორგანიზებაში მნიშვნელოვანი წვლილი შეიტანა აკადემიის საზოგადოებასთან ურთიერთობის სამსახურის თანამშრომელმა შორენა პაიჭაძემ.
ეროვნული თავდაცვის აკადემია მომავალშიც გააგრძელებს საგანმანათლებლო დაწესებულებებთან თანამშრომლობის გაღრმავებას, რაც ხელს შეუწყობს ახალგაზრდების ინფორმირებულობას და აკადემიის საგანმანათლებლო შესაძლებლობების პოპულარიზაციას.
ეროვნულ თავდაცვის აკადემიას მუნიციპალიტეტების საგანმანათლებლო რესურსცენტრების ხელმძღვანელები და სკოლების დირექტორები ეწვივნენ
20.11.2026 16:08:13
კომენტარები
ნანახია: 6 ჯერ
