სრულიად საქართველოს კათოლიკოს-პატრიარქმა პრემიერ-მინისტრს ჰკითხა, რა შეეძლო გაეკეთებინა ბრალდებული დეკანოზის, გიორგი მამალაძის გასათავისუფლებლად. წერს გაზეთი “ალია” სანდო წყაროზე დაყრდნობით.
“თქვენ არ იცით, რამდენად დიდსულოვანია პატრიარქი. მან პრემიერ-მინისტრს უთხრა, რა შემიძლია მისი ციხიდან დასახსნელად გავაკეთო, მამა გიორგი ეშმაკმა აცდუნა და ჩემი ვალია, მას შევუნდო, ყველაფერი ვაპატიოო. ძლივს დაარწმუნეს ეპისკოპოსებმა და ქორეპისკოპოსებმა, რომ ამის გაკეთება არ შეიძლებოდა, ეს ცალსახად გამოძიების, საქმეებში ჩარევა იქნებოდა და ხალხი ამას ძალიან ცუდად გაიგებდა. ცხადია, ეს ყველაფერი პატრიარქმაც ძალიან კარგად იცოდა, მაგრამ მაინც ეძებდა გზებს ციხიდან მის დასახსნელად”,- ამბობს კონფგიდენციალური წყარო გაზეთ “ალიასთან” ინტერვიუში.
წყაროს ინფორმაციით, დაბალი იერარქიის სასულიერო პირებზე საპატრიარქოს ირგვლივ ბოლო დროს გავითარებული მოვლენები ცუდად აისახა, ორმა ახალგაზრდა მღვდელმა ანაფორა გაიხადა და სასულიერო ცხოვრებას დაუბრუნდა.
წყარო, რომელიც გაზეთის ინფორმაციით საპატრიარქოსთან დაახლოებული პირია, ამბობს, რომ მრევლის დიდ ნაწილს რწმენა შეერყა.
“ეკლესიებში მრევლის რაოდენობა ჯერ არ შემცირებულა, მაგრამ ამბობენ, რომ ეკლესიებში შემოწირულობების რაოდენობამ იკლო”,- აცხადებს წყარო.
10 თებერვალს მკვლელობის მომზადების ფაქტზე დეკანოზი გიორგი მამალაძე დააკავეს. მთავარი პროკურორის ინფორმაციით, აღნიშნულ ფაქტზე გამოძიება ერთ-ერთი მოქალაქის განცხადების საფუძველზე დაიწყო, რომელმაც მიუთითა, რომ მისმა ნაცნობმა მამა გიორგი მამალაძემ სთხოვა ციანიდის მოძიებაში დახმარება, რომლის გამოყენებითაც ამ უკანასკნელს უნდა მოეხდინა მაღალი იერარქიის სასულიერო პირის სიცოცხლის ხელყოფა.
გამოძიების შუალედური შედეგებიდან ირკვევა, რომ მოცემული ეტაპისთვის ჩატარებულია ოცდაათზე მეტი მოწმის დაკითხვა, სულ ჩატარებულია ოთხმოცდაათამდე საგამოძიებო/საპროცესო მოქმედება, მათ შორის დათვალიერდა და ამოღებული იქნა მობილური ტელეფონები, კომპიუტერები და ელექტრონული ინფორმაციის სხვა მატარებლები, დაინიშნა შესაბამისი ექსპერტიზები.
www.pia.ge