საპარლამენტო უმრავლესობის წევრი ზაზა ხუციშვილი ბათუმში განვითარებულ მოვლენებს „მარშალპრესის“ პრეს-კლუბში გამართულ პრესკონფერენციაზე გამოეხმაურა. ხუციშვილი არ გამორიცხავს, რომ სიტუაცია „ნაციონალურ მოძრაობას“ საკუთარი ინტერესებისთვის გამოეყენებინა.
„ეს იყო ძალიან დიდი დარტყმა ჩვენი ქვეყნისთვის, ჩვენი ქვეყნის იმიჯისთვის. ეს იყო ძალიან დიდი დანაშაული საკუთარი ქვეყნის წინაშე, რასაც ადეკვატური პასუხის გაცემა უნდა. ვფიქრობ, რომ ეს ვითარება პოლიტიკურმა ძალებმა საკუთარი ინტერესებისთვის გამოიყენეს და შედეგიც სახეზე იყო.
ჩემი გადასახედიდან ჩანს, რომ „ნაციონალური მოძრაობა“ თავისას მაინც არ იშლის. თუკი გადავხედავთ საქართველოს უახლეს ისტორიას, სადაც ეს ძალა იყო, იქ იყო ქვების სროლაც, პროვოკაციებიც, დაპირისპირებაც და ა.შ. მე სერიოზულ საფუძველი მაქვს ეჭვის, რომ ამაში „ნაციონალური მოძრაობა“ იყო ჩართული.
დიდი მადლობა მინდა გადავუხადო სამართალდამცავ ორგანოებს. ვფიქრობ, ადგილი ჰქონდა მცდელობას, რომ სამართალდამცველებს შეცდომა დაეშვათ და მიგვეღო ახალი 7 ნოემბერი ან ახალი 26 მაისი. ჩვენი სამართალდამცავები ამ პროვოკაციებს არ აყვნენ, ამისთვის მადლობელი ვარ. მინიმალური, ადეკვატური ძალის გამოყენებით მოხდა სიტუაციის მართვად ფორმაში გადაყვანა და საბედნიეროდ ყველაფერი დამთავრდა მსხვერპლის გარეშე, თუ არ ჩავთვლით იმას, რომ გარკვეული ტრავმვები ადამიანებმა მიიღეს. იმ ფონზე და იმ ისტორიის გახსენებით, რაც გააკეთა „ნაციონალურმა მოძრაობამ“ 7 ნოემბერს და 26 მაისს საკუთარი ხალხის წინააღმდეგ, ჩვენი სამართალდამცავების მხრიდან, ეს იყო იმის ჩვენება, თუ როგორ უნდა მოექცნენ თუნდაც გაღიზიანებულ საკუთარ მოქალაქეებს“, – განაცხადა ხუციშვილმა.