”ეს ცოტა ნაადრევად დაწყებულ საარჩევნო კამპანიას მაგონებს, მაგრამ ამაში უკანონო არაფერია. სახალხო განხილვები დაანონსებული გვაქვს მმართველ გუნდს. როგორც კი დასრულდება მუშაობა, შემდეგ იწყება სახალხო განხილვები. ამიტომ, დღესდღეობით, როდესაც ყველა პუნქტზე შეთანხმება არ არის და პროექტიც არაა დადებული, ვერ გეტყვით სხვა რა ფუნქცია აქვს ამ შეხვედრებს. ეს მისი ნებაა და აქ ჩვენ არანაირი პრეტენზია არ გაგვაჩნია“, – საპარლამენტო უმრავლესობის წევრი, ზაზა ხუციშვილი პრეზიდენტის კამპანიას ”კონსტიტუცია ყველასია” – ეხმაურება და მიიჩნევს, რომ ეს პრეზიდენტის მიერ ნაადრევად დაწყებულ საარჩევნო კამპანიას ჰგავს.
დეპუტატის თქმით, მისი სურვილი იყო, რომ პრეზიდენტის წარმომადგენლებსაც მიეღოთ მონაწილეობა საკონსტიტუციო კომისიაში და ეს დღესაც არ არის გვიან.
”ძალიან ვწუხვარ, რომ ვერ მოხდა შეთანხმება. არ ვიცი ორივე მხრიდან იყო მაქსიმუმი თუ არა გაკეთებული იმისთვის, რომ ეს შეთანხმება მომხდარიყო, მაგრამ სასურველი იქნებოდა ერთიანი ძალებით ისეთი პროექტი მიგვეღო, რომელზეც შემდეგ აღარ იქნებოდა ზედმეტი საუბრები”, – განაცხადა ზაზა ხუციშვილმა.