საქართველოს პრემიერ-მინისტრმა გიორგი კვირიკაშვილმა დღეს სოფლის გავითარების 2017-2020 წლების სტრატეგიის პრეზენტაცია გამართა და განაცხადა, რომ მთავრობისთვის მთავარი ღირებულება და ამოსავალია ადამიანი.
”პროექტების უმეტესობა, რასაც სახელმწიფო წარმოების, ახალი საქმის დაწყების თუ არსებული ბიზნესის განვითარებისთვის ქმნის, თითქმის უნიკალურია: აწარმოე საქართველოში, შეღავათიანი აგროკრედიტი, დანერგე მომავალი, მცირე მეწარმეობის ხელშეწყობის პროექტი, სტარტაპ საქართველო და მრავალი სხვა – ეს ის სიკეთეებია, რომელზეც წვდომა ჩვენი სოფლის თითოეულ მოსახლეს უნდა ქონდეს. სოფლის, ქალაქის, ქვეყნის ყველა მოსახლე მალე, სულ რამდენიმე დღეში ისარგებლებს უვიზო მიმოსვლის სიკეთით”, – განაცხადა კვირიკაშვილმა.
პრემიერის თქმით, ეს კიდევ ერთი ფურცელია საქართველოს რეგიონული განვითარების თვალსაზრისით.
”ეს ის ახალი შესაძლებლობაა, რომელიც საქართველოს სოფლად მცხოვრებ მცირე მეწარმეებს შეექმნათ, რათა დამყარონ კავშირები ევროპაში შესაძლო პარტნიორებთან, მიიღონ მონაწილეობა სხვადასხვა გამოფენაში, შეიცნონ ის ახალი შესაძლებლობები და გამოიყენონ, რასაც უვიზო მიმოსვლა სთავაზობს საქართველოს ყველა მცხოვრებელს. სოფლის განვითარების სტრატეგიის განხორციელება ძალიან დიდი სტიმული იქნება სოფლად ბიზნესის განვითარებისთვის. სოფლებში ხელმისაწვდომი გახდება ახალი ტექნოლოგიები, გაუმჯობესდება წვდომა მომსახურების სფეროზე. დარწმუნებული ვარ, უწყებათაშორისი საკოორდინაციო საბჭო სოფლის მეურნეობის სამინისტროს ხელმძღვანელობით ეფექტურ კოორდინაციას გაუწევს როგორც სტრატეგიის განხორციელებას, ისე კონკრეტულ ინიციატივებს, რაც სოფლის მოსახლეობის მაქსიმალური ჩართულობით დაიგეგმება.
ამ გეგმით ჩვენ მივაღწევთ რეგიონების წინსვლას, თანამედროვე სოფლის შექმნას და ადგილობრივი მოსახლეობის ცხოვრების დონის გაუმჯობესებას. ჩვენ მზად ვართ, სრულყოფილად განვახორციელოთ ეს სტრატეგია და გარდამტეხი ცვლილებები შევიტანოთ ჩვენს სოფლებში, რაც, დარწმუნებული ვარ, საბოლოოდ ქვეყნის სწრაფ განვითარებასა და თითოეული ადამიანის კეთილდღეობაზე აისახება”, – აღნიშნა პრემიერმა.