ვინც ფიქრობდა, რომ ნატო-ს დრო წავიდა, მათ მოუწიათ უხეშად გამოფხიზლება, როდესაც პუტინი უკრაინაში შეიჭრა, – ამის შესახებ აშშ-ის პრეზიდენტმა, ჯო ბაიდენმა ვაშინგტონში, ნატო-ს სამიტის შეჯამებისას, პრესკონფერენციაზე განაცხადა.
ამასთან, ამერიკის პრეზიდენტმა ისაუბრა, თუ როგორ უჭერდა მხარს ნატო უკრაინას ომის პირველ დღეებში.
„დღეს კიევი კვლავ დგას და ნატო იმაზე ძლიერია, ვიდრე ოდესმე ყოფილა. ნატო არამხოლოდ ძლიერია, ნატო უფრო დიდია“, – განაცხადა ბაიდენმა.
ჯო ბაიდენმა ისაუბრა ღაზის სექტორში მიმდინარე მოვლენებზეც, შეაფასა სამშვიდობო შეთანხმების ჩარჩო.
„მე გავაგზავნე ჩემი გუნდი რეგიონში დეტალების გასარკვევად. ჯერ კიდევ არსებობს ხარვეზები შეთანხმებაში, რომლებიც უნდა მოგვარდეს“, – განაცხადა ამერიკის პრეზიდენტმა და დასძინა, რომ ომი ახლავე უნდა დასრულდეს.
ამასთან, ამერიკის პრეზიდენტს კითხვა დაუსვეს, თუ რატომ რჩებოდა საპრეზიდენტო რბოლაში მაშინ, როდესაც მისი მეგობრები, თანამოაზრე დემოკრატები მოუწოდებდნენ ბაიდენს, რომ უარი ეთქვა არჩევნებში მონაწილეობაზე.
„მე არ ვარ ამ საქმეში ჩემი მემკვიდრეობისთვის, მე ამ საქმეში ვარ იმისთვის, რომ დავასრულო ჩემი დაწყებული საქმე“, – უპასუხა ამერიკის პრეზიდენტმა შეკითხვას.
ნატო-ს სამიტის ფარგლებში გამართულ პრესკონფერენციაზე პრეზიდენტმა ბაიდენმა ვიცე-პრეზიდენტი კამალა ჰარისი შეცდომით, როგორც დონალდ ტრამპი გამოაცხადა.
„მე არ ავირჩევდი ვიცე-პრეზიდენტ ტრამპს ვიცე-პრეზიდენტად, რომ არ ჰქონოდა პრეზიდენტის კვალიფიკაცია“, – განაცხადა ბაიდენმა.
რამდენიმე საათით ადრე გამართულ პრესკონფერენციაზე კი ჯო ბაიდენმა ნატო-ს სამიტზე უკრაინის პრეზიდენტის, ვოლოდიმირ ზელენსკის წარდგენისას მას შეცდომით „პრეზიდენტი პუტინი“ უწოდა.