სრულიად წარმოუდგენელია, დღეს ვინმემ დააბრალოს „ქართულ ოცნებას“ საგარეო პოლიტიკური კურსის შეცვლა, ქვეყნის სუვერენიტეტის ან ინტერესების უკანა პლანზე გადატანა, – ამის შესახებ თბილისის საკრებულოს ფრაქცია „ქართული ოცნება – დემოკრატიული საქართველოს“ წევრმა, ვლადიმერ ბოჟაძემ „დღის ქრონიკაში“ ჩართვისას განაცხადა.
„ვხედავთ, პირდაპირ, ღია ჩარევებს ქვეყნის შიდა პოლიტიკაში, ხედავთ, კონკრეტული ელჩები თუ საერთაშორისო ორგანიზაციები უკვე არ მალავენ, მათ სურვილს, ვინ უნდათ, რომ იყოს ხელისუფლებაში წარმოდგენილი მომავალი საპარლამენტო არჩევნების შედეგად. თუმცა, ვფიქრობ, ამას დიდი გავლენა ვერ ექნება, რადგან თავად ეს ფაქტი უკვე მიუღებელია საქართველოს მოქალაქისთვის, ყველა იმ ადამიანისთვის, ვისთვისაც მნიშვნელოვანია ჩვენი ქვეყნის დამოუკიდებლობა, სუვერენიტეტი, ჩვენ იმიტომ არ გვიბრძოლია, რომ ერთი მიმართულებიდან უბრალოდ, სხვა მიმართულებით გაგვეხედა“, – განაცხადა ბოჟაძემ.
მისივე თქმით, საბჭოთა კავშირის დაშლის შემდეგ, საქართველო იყო პირველი, რომელმაც დამოუკიდებლობა მოიპოვა და შემდეგ დაისაჯა კიდეც სამაჩაბლოს მოვლენებითა და აფხაზეთში ომით.
„ჩვენ ავირჩიეთ ევროატლანტიკური მიმართულება, დასავლური კურსი და ეს კურსი დღესაც გრძელდება. თუ ჩვენ გადავხედავთ ურთიერთობას ევროკავშირს, ნატოსა და საქართველოს შორის, რომელიც ჯერ კიდევ 1992 წელს დაიწყო, ყველაზე მეტი, ვინც ამ მიმართულებით გააკეთა, სწორედ „ქართული ოცნებაა“ და ბუნებრივია, სრულიად წარმოუდგენელია, დღეს ვინმემ დააბრალოს „ქართულ ოცნებას“ ან საგარეო პოლიტიკური კურსის შეცვლა, ან ქვეყნის სუვერენიტეტის ან ინტერესების უკანა პლანზე გადატანა“, – აღნიშნა ბოჟაძემ.
მან ასევე 30 მლნ ევროს გამოყოფის შეწყვეტაზეც ისაუბრა.
„ზოგიერთი საელჩო პირდაპირ ამბობს, რომ ჩვენ აღარ დავაფინანსებთ სახელმწიფოს, ანუ ის თანხა, რომელიც უშუალოდ ბიუჯეტში მდიოდა, რომლის ხარჯვის ყველა თეთრი ღია და გამჭვირვალე იყო, ხმარდებოდა უშუალოდ ქართველ ხალხსა და მოქალაქეებს, ამას თურმე, აღარ დააფინანსებენ. მათ ნაცვლად დააფინანსებენ სამოქალაქო სექტორსა და იმ მედიებს, რომლებიც ტყუილსა და დეზინფორმაციას ავრცელებენ და ამის ფლაგმანები არიან ჩვენს ქვეყანაში.
მინდა შევეხო ჯარის თემას, წარმოიდგინეთ, ჯარის წვრთნები აღარ დაფინანსდება, სამაგიეროდ, ისინი გაწვრთნიან და გადაამზადებენ NGO-ებსა და მედიებს 26 ოქტომბრისთვის. ესეც ხომ დიდი შეურაცხყოფაა“, – დასძინა ბოჟაძემ.