ტაილანდის დედაქალაქ ბანგკოკში მდებარე ხუთვარსკვლავიან სასტუმრო Grand Hyatt Erawan-ში ექვსი ადამიანის ცხედარი იპოვეს, რომლებიც სავარაუდოდ ციანიდით მოწამლეს. ინფორმაციას ამის შესახებ ამერიკული ტელეარხი CNN-ი ავრცელებს.
დაღუპულთა შორის აშშ-ის ორი მოქალაქეა. ინფორმაციის თანახმად, სტუმრებს სასტუმრო გუშინ უნდა დაეტოვებინათ, მაგრამ მას შემდეგ, რაც ისინი სასტუმროს მისაღებში არ გამოჩნდნენ, ადმინისტრაციამ პოლიცია გამოიძახა.
ადგილზე მისულ სამართალდამცველებს ნომერში სამი კაცისა და სამი ქალის ცხედარი დახვდათ. პოლიციის ინფორმაციით, ნომერში აღმოჩენილია ყავისა და ჩაი ჭიქები, რომლებზეც ციანიდი იყო დატანილი. სამართალდამცველები ერთ ადამიანს ეძებენ. გამოძიების ვერსიით, ის მოკლულებს იცნობდა, მათთან ერთად სასტუმროს ნომერი ჰქონდა დაჯავშნილი და სავარაუდოდ ისინი მან მოწამლა.