საიდუმლო სამსახურმა დონალდ ტრამპზე თავდასხმის დღეს საეჭვო პირი სროლამდე 1 საათით ადრე შენიშნა. ამის შესახებ ამერიკელ კონგრესმენებს საიდუმლო სამსახურმა და სამართალდამცველებმა ბრიფინგზე აცნობეს. როგორც ირკვევა, 13 ივლისს, პენსილვანიაში გამართულ ღონისძიებაზე, საიდუმლო სამსახურმა 20 წლის ტომას მეთიუ ქრუკსი საეჭვო პირად თავდასხმამდე 1 საათით ადრე შეაფასა, თუმცა შემდეგ ის ხალხმრავლობაში დაეკარგათ. კონგრესმენებს ასევე განუმარტეს, რომ საიდუმლო სამსახურმა დონალდ ტრამპის სცენაზე ასვლამდე 10 წუთით ადრე უკვე იცოდა, რომ საეჭვო პირი საფრთხეს წარმოადგენდა.
ამერიკის ყოფილი პრეზიდენტის მკვლელობის მცდელობის საქმეზე გამოძიება გრძელდება. საქმეს იკვლევს როგორც დამოუკიდებელი ორგანო, ასევე ფედერალური გამოძიების ბიურო. კონგრესში კი დაწყებულია მოკვლევა იმის დასადგენად, თუ როგორ მოქმედებდა საიდუმლო სამსახური ყოფილი პრეზიდენტის დასაცავად.