იურიდიულ საკითხთა კომიტეტის თავმჯდომარემ, ეკა ბესელიამ თბილისის საქალაქო სასამართლოში საკრებულოს დამოუკიდებელ დეპუტატს, ალექსანდრე ელისაშვილს სარჩელი მოუგო.
ეკა ბესელიას ადვოკატის, გიგა კვერენჩხილაძის ინფორმაციით, საქმე ეხება ალეკო ელისაშვილის მხრიდან ეკა ბესელიას მისამართით სატელევიზიო ეთერიდან გაჟღერებულ ცილისმწამებლურ განცხადებებს.
ალეკო ელისაშვილს დაევალა იგივე ტელეეთერით მის მიერ გახმოვანებული განცხადებების უარყოფა და ჯარიმის სახით 1000 ლარის გადახდა.
„გადაწყვეტილება გამოცხადდა. სარჩელი დაკმაყოფილდა იმ ნაწილში, სადაც ვითხოვდით, რომ ალეკო ელისაშვილის განცხადებები აღიარებული ყოფილიყო ცილისმწამებლურად და შეურაცხმყოფელად. ბატონ ალეკოს დაევალა ამ განცხადებების უარყოფა იგივე ტელეეთერით. კერძოდ, ტელეკომპანია „რუსთავი 2“-ის გადაცემა „არჩევანის“ ეთერით. ნაწილი განცხადებებისა ჩაითვალა შეფასებად და ბუნებრივია, იმ ნაწილში არ დადგება პასუხისმგებლობა. მორალური ზიანის ასანაზღაურებლად მოსამართლემ ალეკო ელისაშვილს 1000 ლარის გადახდა დაავალა“, – განაცხადა გიგა კვერენჩხილაძემ.
მისივე განცხადებით, თანხა მთლიანად გადაირიცხება ობოლ და მზრუნველობამოკლებულ ბავშვთა ფონდში.