რაჭის ეროვნული პარკის ადმინისტრაციის უფროსი, დავით ბიჭაშვილი აცხადებს, რომ მას 19 ივლისს, თავს დაესხნენ ვარლამ გოლეთიანის დაჯგუფების წევრები: გიორგი ბიჭაშვილი, ალიკა ბერიშვილი და აბელ სულთანიშვილი.
როგორც მან „იმედინიუსთან“ განაცხადა, ინციდენტი მაშინ მოხდა, როდესაც ის სამ თანამშრომელს ესაუბრებოდა.
„ეს არის ჯგუფი, ვისაც არ უნდა რაჭის ეროვნული პარკი, რადგან მათ თავიანთი მიწები და ინტერესები აქვთ. ესენი იყვნენ ვარლამ გოლეთიანის აქციის მონაწილეები.
ჯერ ააგორეს პიარი, რომ თითქოს „გამჭვირვალობის კანონის“ მიღების გამო ონის რაიონს გრანტი წაართვესო. ჩვენ ბევრი ვიშრომეთ და ონში შემოდის ევროპული გრანტები და ეს გავასაჯაროეთ. გრანტები არ შეწყვეტილა და ეს პიარი ჩავკალით. მეორე პიარი ის არის, რომ ამათ უნდათ რაჭის ეროვნული პარკი გაუქმდეს და არ იარსებოს, რადგან მათ აქვთ თავისი ბიზნეს მიწები, ჩახლართული ამბებია და ერთ-ერთი მათთვის ხელის შემშლელი ფაქტორია ეს ეროვნული პარკი, რადგან დაცული ტერიტორიაა და იქ ვერც მიწას მიიტაცებ და ვერც გაყიდi.
დღეს, როდესაც ქუჩაში, ჩემს სამ თანამშრომელს ვესაუბრებოდი, თავს დამესხა ვარლამ გოლეთიანის დაჯგუფების სამი წევრი: გიორგი ბიჭაშვილი, ალიკა ბერიშვილი და აბელ სულთანიშვილი. მომაყენეს ფიზიკური და სიტყვიერი შეურაცხყოფა. მაქვს დაზიანებები. ამ წუთას ვიმყოფები პოლიციაში, მომხდარზე აღიძრულია საქმე“, – აღნიშნა დავით ბიჭაშვილმა.