ჰუმანური მიდგომით პარლამენტის მიერ მიღებული გადაწყვეტილებები ახალი და ჩვენს რეალობაში პირველი არ არის. თუ არ ვცდებით, ეს მეთერთმეტე ამნისტიის აქტია, – ამის შესახებ იურიდიულ საკითხთა კომიტეტის თავმჯდომარის პირველმა მოადგილემ, საპარლამენტო უმრავლესობის წევრმა, დავით მათიკაშვილმა „დღის ქრონიკაში“ განაცხადა.
მისივე თქმით. რადიკალური ოპოზიციის წარმომადგენლებმა გუშინ ბოიკოტის რეჟიმში ყოფნა არჩიეს და „ამნისტიის შესახებ კანონპროექტის“ განხილვას არ დაესწრნენ.
„მათ ბოიკოტი გამოუცხადეს ყველა ამ ადამიანის ბედ-იღბალს. ფაქტია, ზუსტად ასე მოხდა. ისინი შემოიფარგლებიან განცხადებებით. ვიწროპარტიული ინტერესებიდან გამომდინარე ისინი ფიქრობენ, რომ ეს მათი წინასაარჩევნო კამპანიისთვის სასარგებლოა.
ჩვენ ვართ ხელისუფლება და ჩვენი პასუხისმგებლობა არის ძალიან დიდი. ჩვენ არ გვაქვს იმის ფუფუნება, რომ გაუგებარი ფრაზებითა და წინადადებებით ხალხს თავი დავამახსოვროთ. ჩვენ ვაკეთებთ საქმეს და ჰუმანური მიდგომით პარლამენტის მიერ მიღებული ასეთი გადაწყვეტილებები ახალი და ჩვენს რეალობაში პირველი არ არის. თუ არ ვცდებით, ეს მეთერთმეტე ამნისტიის აქტია, რაც 2012 წლის შემდეგ ხელისუფლებაში „ქართული ოცნება“ მოვიდა და ის ვერ იქნება რაიმე კონკრეტულ მოვლენასთან დაკავშირებული“, – განაცხადა მათიკაშვილმა.
მისივე თქმით, „ამნისტიის შესახებ მუხლები პიროვნებაზე გათვლით მიღებული გადაწყვეტილებები არ არის“.
„პარლამენტის შესაბამისმა კომიტეტმა, რომელმაც ეს დოკუმენტი მოამზადა, იხელმძღვანელა არა პიროვნებებით, არამედ მუხლებით. რა თქმა უნდა, სტატისტიკა არის ძალიან მნიშვნელოვანი ფაქტორი და ამნისტიის ყველა მუხლთან დაკავშირებით იყო დათვლილი, გააზრებული, გაანგარიშებული ყველა ნიუანსი“, – აღნიშნა მათიკაშვილმა.
მისივე თქმით, თუ რადიკალური ოპოზიცია არჩევნებში დამარცხდება, საკუთარ თავს დააბრალოს და ამის გამო თითს ნურავისკენ გაიშვერს.
პარლამენტმა „ამნისტიის შესახებ“ კანონპროექტი პირველი მოსმენით 19 ივლისის პლენარულ სხდომაზე მიიღო.