კომპანია “IGH” “ნაციონალური მოძრაობის” წარმომადგენლის, ოთარ სირაძის მიერ გავრცელებულ ბრალდებას, თითქოსდა, საავტომობილო გზების დეპარტამენტი კომპანიასთან კორუფციულ გარიგებაში იმყოფება, ეხმაურება და მისგან ინფორმაციის უარყოფას ითხოვს. ინფორმაციას ipn.ge ავრცელებს.
“ჩვენ, სააქციო საზოგადოება “ინსტიტუტი IGH” უკიდურეს აღშფოთებას გამოვთქვამთ პოლიტიკური გაერთიანება “ერთიანი ნაციონალური მოძრაობის” წარმომადგენლის, ოთარ სირაძის მიერ 2017 წლის 14 მარტს გავრცელებულ ცრუ ინფორმაციასთან დაკავშირებით. კატეგორიულად უარვყოფთ განცხადებაში მოყვანილ ბრალდებებს ე.წ. კორუფციულ სქემებთან დაკავშირებით და სრული პასუხისმგებლობით ვაცხადებთ, რომ არათუ მსგავს ფაქტს არ ჰქონია ადგილი, არამედ ჩვენი კომპანიის სახელის ხსენებაც კი მიუღებელი და დაუშვებელია მსგავს კონტექსტში.
მოვითხოვთ განცხადების ავტორისგან, დაუყოვნებლივ უარყოს გავრცელებული მონაჭორი, წინააღმდეგ შემთხვევაში, უფლებას ვიტოვებთ, სასამართლოს გზით დავიცვათ კომპანიის საქმიანი რეპუტაცია, რომელიც დამსახურებულად არის ჩამოყალიბებული ევროპის მრავალ ქვეყანაში ჩვენი მრავალწლიანი პროფესიული საქმიანობით”, – ნათქვამია განცხადებაში.
“ერთიანი ნაციონალური მოძრაობის” წარმომადგენლის, ოთარ სირაძის ინფორმაციით, საავტომობილო გზების დეპარტამენტის უფროსის, გიორგი სეთურიძე ხორვატიულ საპროექტო კომპანია “IGH”-ს ლობირებს და მისი მეშვეობით, კორუფციულ სქემებს ახორციელებს.
სირაძის განცხადებას, ასევე, გამოეხმაურა საავტომობილო გზების დეპარტამენტი, რომელმაც “ნაციონალური მოძრაობის” წევრი სიცრუის გავრცელებაში დაადანაშაულა.