პრეზიდენტმა ვეტო დაადო არა კანონს, არამედ ჩვენი მოქალაქეების უსაფრთხოებას, ვეტო დაადო ბრძოლას ორგანიზებულ დანაშაულთან, ჩვენს შესაძლებლობებს, რომ გავუმკლავდეთ ტერორიზმის რისკებს, – ამის შესახებ უმრავლესობის ლიდერმა არჩილ თალაკვაძემ ჟურნალისტებთან საუბრისას, ე.წ. მოსმენების შესახებ კანონზე საუბრისას განაცხადა.
“ახალ კანონში ფარული საგამოძებო მოქმედებების ფუქნქცია გადის სახელმწიფო უსაფრთხოების სამსახურიდან და გადაეცემა ახალ ორგანიზაციას, რომელსაც არ აქვს გამოძიების უშუალო ინტერესი. ზედამხედველობისა და კონტროლის მექანიზმები არის ძლიერი და შეესებამება იმ მოთხოვნებს, რაც საკონსტიტუციო სასამართლომ მოითხოვა. ეს არის საპარლამენტო კონტროლი, სასამართლო კონტროლი. ეს არის აღმასრულებელი ხელისუფლების კონტროლი.
არასამთავრობო ორგანიზაციების პოზიციაა, მოითხოვონ მეტი და კრიტიკულად შეხედონ საკითხებს, მაგრამ მოქალაქეების უსაფრთხოებისა და სიცოცხლის დაცვა, ეს არის სახელმწიფოს ვალდებულება და ამოცანა. დასავლეთის ნებისმიერ ქვეყანაში ფარული საგამოძიებო მოქმედებების ფუნქცია ითვლება აღმასრულებელ ფუნქციად და არის აღმასრულებელი ხელისუფლების დაქვემდებარებაში. ამიტომ პასუხისიმგებლობა გვეკუთვნის ჩვენ.
პრეზიდენტმა ვეტო დაადო არა კანონს, არამედ ჩვენი მოქალაქეების უსაფრხოებას. ვეტო დაადო ბრძოლას ორგანიზებულ დანაშაულთან, ჩვენს შესაძლებლობლებს, რომ გაუმკლავდეთ ტერორიზმის რისკებს. პრეზიდენტმა ვეტო დაადო იმას, რომ საქართველო იყოს საიმედო პარტნიორი საერთაშორისო უსაფრთხოების კონტექსტში. ეს ვეტო აუცილებლად დაიძლევა”,– განაცხადა თალაკვაძემ.