საპარლამენტო უმრავლესობის წევრის არჩილ გორდულაძის თქმით, გარკვეული დონორი ორგანიზაციები საქართველოში აფინანსებენ არაერთ „ენჯეოსა“ და პარტიას, რომლებიც პოლიტიკაში უცხოური გავლენის თანხების შემოტანას ცდილობენ და ამასთან დაკავშირებით „ქართული ოცნების“ გუნდის მხრიდან გაკეთდა განცხადებები.
გორდულაძის განმარტებით, ხშირად ეს თანხები მიმართულია ქვეყნის დესტაბილიზაციისკენ.
„ვიცით, რა ქმედებები განახორციელა „ისფედმა„ და როგორ გააყალბა პარალელური დათვლის მთელი პროცესი. ამას კი ოპოზიციისგან რყევა და ქვეყნის ჯაყჯაყი მოჰყვა. „ისფედს“ სწორედ NED-ი აფინანსებს. „დროა“, „სირცხვილია“ და ა.შ. რომლებიც შემჩნეული არიან ქვეყნის არევაში, დესტაბილიზაციის მცდელობაში, დაფინანსებული არიან NED-ის მიერ. განსაკუთრებით წინასაარჩევნოდ ქართულ პოლიტიკაში ასეთი თანხების ჩადება კატეგორიულად მიუღებელია. არ უნდა დაგვავიწყდეს, რომ ე.წ. გამოძიებამ ბიძინა ივანიშვილის რეპუტაციის შელახვის მიზნით ცრუ ინფორმაცია გაავრცელა, რასაც კაპიტანი გიგაური აჰყვა. ვინც თანხას იხდის, მუსიკასაც ის უკვეთავს. შესაბამისად, ეს ყველაფერი გარედან მართული იყო. ყველას მოვუწოდებთ, თავი შეიკავონ და თავი დაანებონ პოლიტიკურ მანიპულაციებს. NED-ის მიმართ კითხვები არსებობს ამერიკაშიც, როგორც კონგრესში, ასევე სენატში და მის საქმიანობაზე დეტალურ ანგარიშს ითხოვენ“, – განაცხადა არჩილ გორდულაძემ.