უნგრეთის ხელისუფლება იწყებს ახალი კანონის პრაქტიკაში გამოყენებას, რომელიც მნიშვნელოვნად აისახება ზოგიერთი უკრაინელი დევნილის ცხოვრებაზე. ერთი კვირის წინ ძალაში შესული კანონმდებლობა ამკაცრებს ფასიან საცხოვრებელზე ხელმისაწვდომობის პირობებს. ახლა მისი გამოყენება მხოლოდ საომარი მოქმედებებით უშუალოდ დაზარალებული ტერიტორიების მცხოვრებლებს შეეძლებათ, რომელსაც უნგრეთი უკრაინის 24 ოლქიდან 13-ს, ასევე ქვეყნის დედაქალაქს კიევს და რუსეთის მიერ ოკუპირებულ ყირიმის ნახევარკუნძულს მიაკუთვნებს.
ბუდაპეშტის დასავლეთით მდებარე კოჩის დასახლებაში ათეულობით უკრაინელ ქალს მოუწია კერძო ჰოსტელის დატოვება – მთელი თავისი ქონებით და ბავშვებთან ერთად. ახალი კანონმდებლობის თანახმად, უფასო საცხოვრებლის უფლება ახლა მხოლოდ რუსეთის აგრესიის ქვეშ მყოფი ქვეყნის აღმოსავლეთ რეგიონების მოსახლეობას აქვს.
„ჩვენთვის არავის არაფერი უთქვამს. ისიც არ ვიცით, ვინმე დაგვეხმარება თუ ბავშვებთან ერთად დილამდე აქ დავრჩებით დასაძინებლად. არ ვიცით, რა მოგვივა“, – ამბობს უკრაინელი დევნილი უნგრეთში, ანა ლაკატოში.
„შეიძლება იქ, კარპატებში ბომბები არ ცვივა, მაგრამ ჩვენი ბიჭები ომში მიჰყავთ. ისინი მხოლოდ ჩვიდმეტი-თვრამეტი წლისანი არიან“, – ამბობს ანიტა დავიდოვი, კიდევ ერთი ლტოლვილი, ლაკატოშმა კი დასძინა, რომ მისმა უფროსმა დამ ცოტა ხნის წინ 21 წლის ვაჟი დაკრძალა.
დროებითი დაცვის სტატუსის მქონე ათასობით ადამიანი
31 000 უკრაინელი უნგრეთში ამჟამად დროებითი დაცვის ქვეშ იმყოფება. პირობების შეცვლის შემდეგ, სამი ათასი მათგანი უსახლკაროდ დარჩა. „ჩვენ ვურეკავთ მსხვილ საქველმოქმედო ორგანიზაციებს, რათა გავიგოთ, აქვთ თუ არა მათ საცხოვრებელი საგანგებო სიტუაციებში ჩავარდნილი ადამიანებისთვის. მაგრამ, როგორც ჩანს, მათ არაფერი აქვთ“, – აცხადებს უნგრეთის ჰელსინკის კომიტეტის დევნილთა საკითხების ხელმძღვანელი, ანიკო ბაკონი.
გაერო-ს ლტოლვილთა უმაღლესი კომისრის ოფისმა უკვე მოუწოდა უნგრეთის მთავრობას, გადახედოს ამ გადაწყვეტილებას. ცენტრალურ ევროპაში ოფისის წარმომადგენლის, ჯულია ნაბონის თქმით, წარმომავლობის ქვეყანაში დაბრუნება არის და უნდა დარჩეს ფუნდამენტურ უფლებად. „მაგრამ ეს უნდა იყოს შეგნებული, სრულიად ნებაყოფლობითი გადაწყვეტილება და არა იძულებითი“, – აღნიშნა მან.
უნგრეთის მთავრობის წარმომადგენელი დევნილთა საკითხებში, ნორბერტ პალი საკანონმდებლო ცვლილებებს მიზანშეწონილად მიიჩნევს. მისი თქმით, იმ დევნილებმა, ვისაც უნგრეთში ფეხზე წამოდგომა სურდა, ეს უკვე გააკეთეს. ზოგიერთი დევნილი უკრაინელი საკუთარი საცხოვრებლის საფასურს თავად იხდის. ისინი, ვინც ამას ვერ ახერხებს, იძულებულნი არიან, ნათესავების, მოხალისეების და საქველმოქმედო ორგანიზაციების დახმარებას დასჯერდნენ. ერთი სიტყვით, ომის დროს სტაბილურობის პოვნა ძალიან რთულია.