ვენესუელის სასამართლომ ოპოზიციონერ ედმუნდო გონსალესის, რომელიც ქვეყნის საპრეზიდენტო კანდიდატი იყო, დაპატიმრების ორდერი გასცა. ინფორმაციას BBC ავრცელებს.
სასამართლომ დაპატიმრების ორდერი ქვეყნის პროკურატურის მოთხოვნის შესაბამისად გასცა. პროკურატურა გონსალესს რამდენიმე მძიმე დანაშაულის ჩადენას ედავება, მათ შორისაა სახელმწიფო მოვალეობის უზურპაცია, დოკუმენტების ფალსიფიცირება, დაუმორჩილებლობისაკენ და სისტემური საბოტაჟისკენ მოწოდება.
გონსალესი, რომელიც იმალება, ყველა ბრალდებას უარყოფს. „ამ ქვეყანაში არავინ დგას კანონზე, ინსტიტუტებზე მაღლა“, – თქვა ვენესუელის პრეზიდენტმა ნიკოლას მადურომ ერთ-ერთი ტელეარხის ეთერში.
ვენესუელაში საპრეზიდენტო არჩევნები 28 ივლისს ჩატარდა. ქვეყნის საარჩევნო ორგანომ ხმების 52%-ით გამარჯვებულად მოქმედი პრეზიდენტი ნიკოლას მადურო გამოაცხადა, რასაც ქვეყანაში საპროტესტო გამოსვლები მოჰყვა. აქციების დროს დააკავეს 2 400-ზე მეტი ადამიანი. მასობრივი არეულობების შედეგად კი 23 ადამიანი დაიღუპა.
საპრეზიდენტო არჩევნების შედეგები ვენესუელაში აშშ-მა, ევროკავშირმა და სხვა ქვეყნებმა არ აღიარეს. ისინი ლეგიტიმურ პრეზიდენტად ედმუნდო გონსალესს აღიარებენ.