უკრაინის უმაღლესმა რადამ პლენარულ სხდომაზე დმიტრო კულება ქვეყნის საგარეო საქმეთა მინისტრის თანამდებობიდან გაათავისუფლა. ინფორმაციას უკრაინელი დეპუტატი იაროსლავ ჟელეზნიაკი ტელეგრამის საკუთარ არხზე ავრცელებს.
კულებას თანამდებობიდან გადაყენებას 240-მა დეპუტატმა დაუჭირა მხარი. მან გათავისუფლების შესახებ წერილით რადას ოთხშაბათს მიმართა. გავრცელებული ინფორმაციით, კულებას საგარეო საქმეთა მინისტრის პოსტზე მისი მოადგილე ანდრეი სიბიგა შეცვლის.
უკრაინის უმაღლესმა რადამ ოთხშაბათს თანამდებობიდან ასევე გაათავისუფლა სტრატეგიული მრეწველობის მინისტრი ალექსანდრე კამიშინი, ევროპულ და ევროატლანტიკურ სტრუქტურებში ინტეგრაციის საკითხებში უკრაინის ვიცე-პრემიერი ოლგა სტეფანიშინა, გარემოს დაცვისა და ბუნებრივი რესურსების მინისტრი რუსლან სტრელეცი და იუსტიციის მინისტრი დენის მალიუსკა.
რადამ თანამდებობა დაატოვებინა აგრეთვე უკრაინის ვიცე-პრემიერს და დროებით ოკუპირებული ტერიტორიების რეინტეგრაციის საკითხებში მინისტრს ირინა ვერეშჩუკს.