ადრონული თერაპიის პროექტი არის მართლაც უნიკალური პროექტი, ძალიან კომპლექსური პროექტი, – განაცხადა ქუთაისის საერთაშორისო უნივერსიტეტის რექტორმა გიორგი ხუბუამ „დღის ქრონიკასთან“ საუბრისას.
მისი თქმით, დღეს სასწავლებელს სტუმრობს დელეგაცია მიუნხენის ტექნიკური უნივერსიტეტიდან, რომელთა ინტერესის სფეროს სწორედ, ადრონული თერაპიის პროექტის მიმართულებით ქუთაისის საერთაშორისო უნივერსიტეტთან თანამშრომლობა წარმოადგენს.
„მინდა აღვნიშნო, რომ ჩვენთან დღეს მიუნხენის ტექნიკური უნივერსიტეტიდან ჩამოსული დელეგაციის ძალიან დიდი უმრავლესობა პროფესორებისა, აქ ჩამობრძანდა სწორედ იმიტომ, რომ მათ აინტერესებთ ადრონული თერაპიის მიმართულებით ქუთაისის საერთაშორისო უნივერსიტეტთან თანამშრომლობა. ეს თანამშრომლობა მოხდება ორი ფორმით. ერთი, წმინდა სამეცნიერო კვლევების მიმართულებით. და მეორე, სამედიცინო მიმართულებით, რადგანაც ადრონული თერაპიის მეშვეობით, ეს არის ერთ-ერთი ყველაზე თანამედროვე მეთოდი სიმსივნის წინააღმდეგ ბრძოლის და თერაპიისა. ამიტომ ადრონული თერაპიის მიმართულებით თანამშრომლობის გააქტიურებას არამც თუ ვაპირებთ, არამედ ჩვენს სასწავლო პროგრამებს ავაგებთ იმ მოთხოვნის შესაბამისად, რომ აქ ამ პროგრამის ფარგლებში გაზრდილი კადრები მომზადებული იყვნენ ამ დონის ექსპერიმენტებისთვის. თვითონ ტექნიკური მოწყობილობა უკვე შეძენილია ფონდ „ქართუს“ მიერ. ახლა, ამ ეტაპზე უკვე აქტუალურია, რომ ჩვენ სათანადო კადრები მოვამზადოთ ადრონული თერაპიის ცენტრისათვის“, – განაცხადა გიორგი ხუბუამ.