პოლონეთის საგარეო საქმეთა მინისტრი რადოსლავ სიკორსკი რუსი პრანკერების ვოვანისა და ლექსუსის მახეში გაება და უკრაინის შესახებ მათ ყველაფერი მოუყვა. ინფორმაციას რუსული მედია ავრცელებს.
მათი ცნობით, ვოვანმა და ლექსუსმა სიკორსკის უკრაინის ყოფილი პრეზიდენტის პეტრო პოროშენკოს ხმით დაურეკეს და უკრაინის გარშემო მიმდინარე ამბებზე ალაპარაკეს.
„[უკრაინისთვის ბრძოლის] სურვილი ნულოვანია. ყველაფერი შესაძლოა შეიცვალოს, თუ უკრაინის ფრონტი ჩამოიშლება, მაგრამ მოცემულ მომენტში ამის გაკეთების სურვილი არის ნულოვანი“, – თქვა სიკორსკიმ.
„თქვენ იცით, რომ ახლა ჩვენ განვიხილავთ იმას, ჩამოვაგდოთ თუ არა თქვენს საჰაერო სივრცეში რუსული ფრთოსანი რაკეტები ჩვენი საჰაერო სივრციდან. ესეც კი მოცემულ მომენტში ძალიან საკამათოა. ამ მხრივაც არ არსებობს არავითარი შეთანხმება, იმიტომ რომ ასეთი ქმედება ომში შესვლას ნიშნავს“, – დასძინა სიკორსკიმ.
მინისტრმა აგრეთვე სკეპტიკურად შეაფასა უკრაინის ნატოში გაწევრიანების პერსპექტივა. „დასავლეთში ამ იდეას რუსეთთან სავაჭროდ იყენებენ. ევროპაში რუსეთთან ომის სურვილი არ გააჩნიათ. ეს აბსოლუტურად წითელი ხაზია“, – თქვა სიკორსკიმ.
იგივე აზრისაა სიკორსკი უკრაინის ევროკავშირში გაწევრიანებასთან დაკავშირებით. „ეს პროცესი, შესაძლოა, ათწლეულები გაგრძელდეს, მითუმეტეს როცა ევროპელებს ხელს არ აძლევს მიიღოს ქვეყანა, რომელსაც კონკურენტუნარიანი სოფლის მეურნეობა აქვს და დიდი მოსახლეობა ჰყავს“, – აღნიშნა მან.
როგორც პოლონეთის საგარეო საქმეთა მინისტრი ამბობს, უკრაინის ტერიტორიის უმეტესი ნაწილი საცხოვრებლად უვარგისი გახდება და ევროპა ლტოლვილების კიდევ ერთ დიდ ნაკადს ელოდება.