სენატორს (ჯიმ რიში) ჰგონია, რომ თუ სიძულვილის ენით ილაპარაკებს ხალხის მიერ არჩეულ მთავრობაზე, ეს რაღაცნაირად დადებითად იმოქმედებს ამ რადიკალური ჯგუფების რეიტინგზე, რომელსაც პულსი აღარ ესინჯება ჩვენს ქვეყანაში, – განაცხადა ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარემ რატი იონათამიშვილმა „დღის ქრონიკასთან“ საუბრისას.
მისი თქმით, ქართველი ხალხი დგას მარტივი არჩევანის წინაშე – ომი თუ მშვიდობა?! შესაბამისად, მსგავსი განცხადებები, როგორიც სენატორმა ჯიმ რიშიმ გააჟღერა, გავლენას ვერ მოახდენს ამომრჩევლის გადაწყვეტილებაზე.
„ეს ადამიანები არ იცნობენ ჩვენს საზოგადოებას და არ იცნობენ ქართველ ხალხს. გავიხსენოთ რამდენიმე თვის წინ როთის განცხადება, რომელიც მაშველ რგოლად ჰყავდა ჩამოყვანილი რადიკალურ ჯგუფებს და ამ დროს აქ ხან ახალგაზრდებს მიაყენა შეურაცხყოფა, ხან ეკლესიის მიმართ სცადა შეურაცხყოფის მიყენება და ა.შ. ზუსტად იგივე კონტექსტი გრძელდება ახლაც. აი, ამ კონკრეტულ სენატორს (ჯიმ რიში), რომელსაც ჰგონია, რომ თუ სიძულვილის ენით ილაპარაკებს ხალხის მიერ არჩეულ მთავრობაზე, ეს რაღაცნაირად დადებითად იმოქმედებს ამ რადიკალური ჯგუფების რეიტინგზე, რომელსაც პულსი აღარ ესინჯება ჩვენს ქვეყანაში.
შესაბამისად, ასეთ განცხადებებს, ასეთ დამოკიდებულებას, ასეთ რიტორიკას ერთადერთი ეფექტი შეიძლება ჰქონდეს და ეს ეფექტი იქნება საქართველოს სასარგებლოდ. ვინაიდან, ჩვენს ხალხს კიდევ უფრო გააერთიანებს კონკრეტული არჩევანის გაკეთების ირგვლივ. დღეს არის ძალიან მარტივი გასაკეთებელი არჩევანი. არჩევანი ღირსებისკენ თუ არჩევანი აგენტურისკენ და არჩევანი მშვიდობისაკენ თუ ომისკენ – აი, ეს არჩევანი აქვს დღეს ჩვენს საზოგადოებას. და ეს რომ ასეთი მკაფიო და მარტივი არჩევანია, მსგავსი განცხადებები, მსგავსი რიტორიკა, მსგავსი შოუები, რასაც ჩვენ გუშინ ვუყურებდით და ღალატის ასეთი აქტები, ჩვენს საზოგადოებას საბოლოო ჯამში სწორი, ობიექტური და საქართველოს სასარგებლო გადაწყვეტილების მიღებაში დაეხმარება“, – განაცხადა რატი იონათამიშვილმა.