ყალბ აჟიოტაჟს უწოდებს მმართველი გუნდი ოპონენტების სპეკულაციებს ბიძინა ივანიშვილის მიერ გაკეთებულ განცხადებასთან დაკავშირებით. პარლამენტის ვიცე-სპიკერი არჩილ თალაკვაძე ამბობს, რომ ოპოზიცია ქვეყნის ქაოსში და დესტაბილიზაციაში შეყვანას ემსახურება.
„ყალბმა აჟიოტაჟმა, რომელიც მოჰყვა ჩვენი ლიდერების განცხადებებს, კიდევ ერთხელ აჩვენა თუ ვინ არის ამ ქვეყანაში ომის პარტია და ვის სურს, რომ ქვეყანა შეიყვანოს ქაოსში, დესტრუქციაში, დესტაბილიზაციაში და აქედან რაღაც პოლიტიკური შედეგი მიიღოს, უკანა კარით როგორმე შემოვიდეს პოლიტიკაში. ეს იგივე ხალხია, ვინც ყველაფერზე იყო ხელის მომწერი, ოღონდ შეენარჩუნებინათ ძალაუფლება. ეს იგივე ხალხია, ვინც ხელი მოაწერა ევროსაბჭოში რეზოლუციას და საკუთარი ჯარისკაცები ომის დაწყებაში დაადანაშაულეს. დღეს ჰყოფნით მორალი, გამოდიან და კიდევ აკრიტიკებენ ხელისუფლებას, რომელმაც შევძელით ამ 12 წლის განმავლობაში მშვიდობის დაცვა“, – აღნიშნავს თალაკვაძე.
მმართველი პარტიის საპატიო თავმჯდომარემ, გორში წინასაარჩევნო კამპანიის ფარგლებში გამართულ შეხვედრაზე სიტყვით გამოსვლისას მშვიდობის მნიშვნელობაზე გააკეთა აქცენტი, ასევე, ქვეყნის განვითარებაზე, ეროვნული ღირებულებების, რელიგიის დაცვაზე, საკონსტიტუციო უმრავლესობის მნიშვნელობაზე ისაუბრა. ბიძინა ივანიშვილმა ხაზი გაუსვა ჩვენს ოს ძმებთან შერიგებისა მნიშვნელობასაც, რასაც რადიკალების გაღიზიანება მოჰყვა.