მამუკა ხაზარაძესა და გიორგი გახარიას შორის მორიგი შეხვედრა ცოტა ხნის წინ დასრულდა. მათ პოლიტიკურ გაერთიანებაზე იმსჯელეს. როგორც გახარიამ შეხვედრის დასრულების შემდეგ განაცხადა, მამუკა ხაზარაძემ დამატებითი დრო ითხოვა, რომ გარკვეული საკითხები საკუთარ გუნდთან შეათანხმოს.
მედიასთან კომენტარი გააკეთა ხაზარაძემაც. მისი თქმით, გახარიას „თანაბარსწორუფლებიან პარტნიორად“ შესთავაზა კოალიციაში შემოსვლა. „ლელოს“ ლიდერს აღნიშნულთან დაკავშირებით, დამატებითი განმარტება არ გაუკეთებია.
„ლელოს ბაზაზე ახალი გაერთიანება შევქმენით, სადაც გვყავს კოალიციური პარტნიორები. ვუსმენ და ვითვალისწინებ მათ აზრს და შესაბამისად, მათთან შეთანხმების გარეშე მე დამოუკიდებლად ნაბიჯს არ გადავდგამ. ბატონ გიორგის შევთავაზეთ, რომ ამ გაერთიანებაში შემოსულიყო თანაბარსწორუფლებიან პარტნიორად, შესაბამისად, ჩვენ გავაგრძელებთ კონსულტაციებს. არჩევნებამდე გვინდა მოქალაქეებს ვაჩვენოთ, როგორ გამოიყურება კოალიცია“, – განაცხადა ხაზარაძემ.