უკრაინამ უახლოეს კვირებში რუსეთის ტერიტორიაზე დარტყმებისთვის შორ მანძილზე მოქმედი Storm Shadow-ის რაკეტების გამოყენების ნებართვა ფარულად შეიძლება მიიღოს. ინფორმაციას ამის შესახებ გამოცემა The Times-ი ავრცელებს.
როგორც გამოცემა აღნიშნავს, დიდი ბრიტანეთი და აშშ ნებართვის გასაცემად ემზადებიან, მაგრამ ოფიციალური განცხადების გაკეთება მხოლოდ პირველი რაკეტების გაშვების შემდეგ სურთ.
გამოცემის წყაროებმა განაცხადეს, რომ აშშ-ს სურს, პირველ რიგში, უკრაინის პრეზიდენტის გამარჯვების გეგმა იხილოს, რომელსაც ის მომდევნო კვირაში ჯო ბაიდენს წარუდგენს.
თუმცა, როგორც სტატიაშია ნათქვამი, ჯო ბაიდენის გუნდში არსებობს შეშფოთება, რომ ამ ნაბიჯმა შეიძლება ზიანი მიაყენოს კამალა ჰარისის საარჩევნო კამპანიას.
ბრიტანეთის საგარეო საქმეთა მინისტრმა, დევიდ ლემიმ მიმდინარე კვირაში პარიზში მოლაპარაკებები გამართა აშშ-ის სახელმწიფო მდივანთან, ენტონი ბლინკენთან, ასევე საფრანგეთის, გერმანიისა და იტალიის საგარეო საქმეთა მინისტრებთან.