აშშ მომავალ კვირას უკრაინისათვის შეიარაღების მნიშვნელოვანი პაკეტის გამოყოფას გამოაცხადებს, თუმცა მიწოდება, სავარაუდოდ, გადაიდება მარაგების დეფიციტის გამო. ინფორმაციას ამის შესახებ ტელეკომპანია CNN-ი ოფიციალურ წყაროებზე დაყრდნობით ავრცელებს.
როგორც CNN-ი აღნიშნავს, ეს პაკეტი მნიშვნელოვნად აღემატება ბოლოდროინდელ დახმარებას, რომელიც დაახლოებით 200 მილიონი დოლარის ნიშნულზე იყო. სავარაუდოდ, ის მოიცავს საარტილერიო ჭურვებს, საჰაერო თავდაცვის სისტემებსა და სხვა იარაღს, რომელიც „გადამწყვეტია საბრძოლო ოპერაციებისთვის“.
აშშ-ს ამჟამად 5.9 მილიარდი დოლარი აქვს დარჩენილი მარაგების შემცირების საპრეზიდენტო უფლებამოსილების ფარგლებში, რომელსაც ვადა ეწურება ფისკალური წლის ბოლოს.
ეს უფლებამოსილებები პენტაგონს საშუალებას აძლევს ამოიღოს შეიარაღება პირდაპირ აშშ-ის მარაგებიდან.
მიმდინარე კვირის დასაწყისში CNN-მა გაავრცელა ინფორმაცია, რომ აშშ უკრაინას სამხედრო დახმარების მცირე პაკეტებს აწვდის, რადგან იარაღისა და აღჭურვილობის მარაგი, რომელიც პენტაგონს სურს გააგზავნოს უკრაინაში საკუთარი მარაგებიდან, შემცირდა.