საკონტროლო გასროლით მოკლული, ქვამობმული მამა ზღვაში ჩამიძირეს და ცილს სწამებდნენ, რომ იყო მოღალატე. მივიღოთ ისეთი გადაწყვეტილება, რომ ერისა და ბერის წინაშე ვიყოთ მართალნი და სწორნი, – განაცხადა მიხეილ სააკაშვილის ხელისუფლების მიერ მოკლული პაატა ქარდავას შვილმა ბექა ქარდავამ.
„ის არ გვაკმარეს, რომ მამა – საკონტროლო გასროლით მოკლული, ქვამობმული ადამიანი ზღვაში ჩამიძირეს და მისი საფლავიც კი არ მაღირსეს. მათ მიერ, ჯალათების მიერ მოკლულ ადამიანს კიდევ ცილს სწამებდნენ, მასზე ამბობდნენ, რომ იყო მოღალატე და ამაში გვარწმუნებდნენ მთელ ოჯახს. მივიღოთ ისეთი გადაწყვეტილება, რომ ერისა და ბერის წინაშე ვიყოთ მართალნი და სწორნი, რომ შევძლოთ, ჩვენს შვილებს ხვალ და ზეგ თვალებში შევხედოთ და ჩვენი არჩევანის არასწორობის გამო არ გვქონდეს სირცხვილის განცდა. ავირჩიოთ ის სწორი გზა, ის მშვიდობა და ის სამართლიანობა, რომელიც ესაჭიროება საქართველოს და არ დავბრუნდეთ იმ ძველ დამცირებასა და წნეხში ყოფნის წლებში”, – განაცხადა ბექა ქარდავამ.
თავდაცვის სამინისტროს დაზვერვის ოფიცერ პაატა ქარდავასთვის 2008 წლის აგვისტოში თავისუფლების უკანონო აღკვეთასა და მკვლელობაში დამნაშავედ სასამართლომ კუდ-ის აფხაზეთის სამმართველოს ყოფილი უფროსი რომან შამათავა 2016 წელს ცნო.