სასტუმრო „ბოდბე“ მთლიანად ქართული ინვესტიციით აშენდა, რომლის მოცულობა 56 მლნ დოლარია და სასტუმროში დასაქმდება 200-მდე ადამიანი, რომელთა უმეტესობა ადგილობრივი მცხოვრებია, – ამის შესახებ საქართველოს პრემიერ-მინისტრმა ირაკლი კობახიძემ სიღნაღში, სასტუმრო „ბოდბეს“ გახსნის ღონისძიებაზე სიტყვით გამოსვლისას განაცხადა.
მთავრობის მეთაურის შეფასებით, მაღალი კლასის სასტუმროების გახსნა ძალიან მნიშვნელოვანია სიღნაღისთვის, კახეთისთვის და საერთაშორისო დონეზე ქვეყნის პოპულარიზაციისთვის.
პრემიერმა ფონდ „ქართუს“, „სმარტ კაპიტალს“ და ვანო ჩხარტიშვილს პროექტის განხორციელებისთვის მადლობა გადაუხადა.
„მნიშვნელოვანია, რომ ეკონომიკა ჩვენს ქვეყანაში სწრაფი ტემპით ვითარდება. ამ კუთხით ჩვენ ვართ მოწინავე პოზიციებზე, არა მხოლოდ რეგიონში, არამედ ევროპის მასშტაბით. ეკონომიკური ზრდის ტემპით ჩვენ ვუსწრებთ ყველა ევროპულ ქვეყანას და ჩვენთვის ამ ტემპის შენარჩუნება ძალიან მნიშვნელოვანია. ამ კუთხით, ტურიზმის განვითარებას განსაკუთრებული მნიშვნელობა ენიჭება. ტურიზმი არის ჩვენი ეკონომიკის ერთ-ერთი უმთავრესი სექტორი და მომავალშიც დიდი ყურადღება უნდა მივაქციოთ ამ სფეროს განვითარებას.
სწორი ეკონომიკური პოლიტიკისა და ეკონომიკური გარემოს მნიშვნელობის გარდა ხაზი უნდა გაესვას მშვიდობის და სტაბილური განვითარების მნიშვნელობას, რადგან მშვიდობისა და სტაბილურობის გარეშე ვერც ერთ ქვეყანაში ეკონომიკა ვერ განვითარდება. აქედან გამომდინარე, ჩვენთვის სათანადო ეკონომიკური და ბიზნესგარემოს შენარჩუნებასთან ერთად განსაკუთრებული მნიშვნელობისაა მშვიდობის და სტაბილური გარემოს შენარჩუნება ჩვენს ქვეყანაში“, – განაცხადა პრემიერ-მინისტრმა.
სასტუმროს გახსნის ღონისძიებაზე შეკრებილ სტუმრებს სიტყვით მიმართეს პარლამენტის თავმჯდომარე შალვა პაპუაშვილმა, ტურიზმის განვითარების ფონდის აღმასრულებელმა დირექტორმა გიორგი ბაიდარაშვილმა და „სმარტ კაპიტალის“ დამფუძნებელმა მიხეილ ჩხარტიშვილმა. ღონისძიებას აღმასრულებელი, საკანონმდებლო და ადგილობრივი ხელისუფლების, ასევე ბიზნესის წარმომადგენლები დაესწრნენ.
