უკრაინის პრეზიდენტის ვოლოდიმირ ზელენსკის განცხადებით, რუსეთთან ენერგოობიექტების ურთიერთ დაბომბვისგან თავის შეკავების შესახებ შეთანხმების მიღწევა, შესაძლოა, ქვეყნებს შორის ცეცხლის შეწყვეტის წინაპირობა გახდეს. ინფორმაციას The Financial Times-ი ავრცელებს.
„მშვიდობის პირველი სამიტის დროს ჩვენ ვიხილეთ, რომ ენერგეტიკულ უსაფრთხოებასთან დაკავშირებით გადაწყვეტილების მიღება შესაძლებელია. სხვა სიტყვებით რომ ვთქვათ, ჩვენ თავს არ ვესხმით მათ [რუსეთის] ენერგეტიკულ ინფრასტრუქტურას, ისინი – ჩვენსას. შეიძლება თუ არა, რომ ამან ომის ცხელი ფაზა დაასრულოს? ვფიქრობ, კი“, – განუცხადა ზელენსკიმ The Financial Times-ს.
უკრაინის ლიდერმა აგრეთვე მოუწოდა რუსეთს უკრაინულ პორტებში სატვირთო გემებზე თავდასხმებისგან თავი შეიკავოს. მისი თქმით, როცა საუბარი ეხება ენერგეტიკას და თავისუფალ ნაოსნობას, ამ ორი პირობის გარშემო შეთანხმების მიღწევა დასტური იქნებოდა იმისა, რომ რუსეთი მზადაა ომი შეწყვიტოს.
ამასთან ერთად, ზელენსკი დარწმუნებულია, რომ რუსეთი აშშ-ში 5 ნოემბერს დაგეგმილ საპრეზიდენტო არჩევნების შედეგებს ელოდება და მხოლოდ ამის მერე გადაწყვეტს დაიწყოს თუ არა უკრაინასთან სამშვიდობო მოლაპარაკებები.